بلوچ نیشنل موومنٹ ( بی این ایم ) ءِ سرکماش ڈاکٹر نسیم ءَ گل ءِ وانگ ءُ ھیلکاری تک ءِ مراگشے ءَ گْوشتگ بی این ایم ءِ راھشون ءُ باسکانی دائمانیں دیمونی بلوچ راج ءِ واھگ ، داشت ءُ اوپار ءِ درانگازی ءَ کن اَنت۔بی این ایم ءِ راھشون ءُ باسکاں مدام اے ھبر من اتگ کہ آجوئی ءِ جھد شول کش ، مانگیش اتگ ءُ گْرانیں پندے، آیاں ناں ایوک ءَ لشکر کشی ءُ آزار سگ اتگ بلکیں باز باسک پاکستانی لشکر ءَ زور بیگواہ کنگ ءَ پد آزار داتگ۔ باز کارکناں وتی سر نْدر کرتگ اَنت۔اے درسیں زوراکیاں پد ھم بی این ایم ءَ بلوچستان ءِ آجوئی ءِ جھد برجاہ داشتگ۔
آئی ءَ گْوشتگ بلوچستان ءَ زورگریں پاکستانی لشکر ءِ زوراکی ءِ دْرچ روچ پہ روچ گیش بیان اِنت، بلوچ ورنا آوار جنگ بیگ ءَ اَنت ، جتائیں ھند ءُ دمگاں آیانی کنٹ دست کپگ ءَ اَنت۔ دومی نیمگ ءَ پاکستانی لشکر لوگانی سر ءَ بم گواری کنگ ءَ اِنت ، جنین ءُ چکانی کوش ءِ دْرچ ھم تیز بیتگ۔
آئی ءَ گْوشتگ بلوچ ءُ بی این ایم ءِ کارکن ءِ بستار ءَ اے مئے کردانکی ءُ راجی زمہ واری اِنت کہ ما بلوچستان ءَ برجاھیں مردمی اگبالانی بگیریانی سر ءَ توار چست بہ کن ایں۔اے وھدی بلوچستان ءَ بلوچانی سر ءَ بیوکیں زوراکی روچ پہ روچ ترند بیان اَنت ءُ اے رد ءَ مئے بے تواری ناں ایوک ءَ مئے پجار بلکیں مردمگری ءِ ھم چپ اِنت۔ ما شر بہ زان ایں کہ اے مئے چاگردی ءُ مردمی ڈبہ اِنت کہ ما بلوچستان ءِ آجوئی ءُ بلوچ راج ءِ پھریزگ ءَ داں مئے وسے روت کوشست بہ کن این ءُ انسانی ھکانی لگتمالیانی بگیری ءَ پرتوان ءُ مدامانیں زْرمبشتے ءِ بنیاد ءَ ایر بہ کن ایں۔
آئی ءَ گْوشتگ گچینی ورنایانی سر ءَ اے المی اِنت کہ آ وتی پجار ءُ گْوستانک بہ زان اَنت ءُ اے راستی ءَ سرپد بہ بہ اَنت کہ پاکستان ءَ چون مئے راستیں پجار ءُ گْوستانک ءِ گار ءُ گمسار کنگ ءِ کوشست کرتگ۔زورگریں پاکستان ءَ مدام بلوچ راج ءِ دودمان ، زبان ، ربیدگ ءُ گْوستانک ءِ کوردیم کنگ ءَ گوں زور ءَ کوشست کرتگ داں بلوچ چہ وتی راستیں ھستی ءُ پشت پدی مڈی ءَ دیر کنگ بہ بیت۔ورنا چہ اے راستی ءَ آژناک بہ بہ اَنت کہ آیانی پجار تیوک ءَ زمین ءِ چنڈ، ھند ءُ ھلک یا سرکاری دیدانک ءِ بھر نہ اِنت ، بلکیں جھلیں گوں گْوستانک ءُ دودمانی گْرینکاں پیوست اِنت ، کہ زورگریں پاکستان ءَ ایشانی گوں زور ءَ چیرترینگ ءِ سکا کوشست کرتگ۔
گڈ سر ءَ آئی ءَ درائینتگ ، زورگریں پاکستان ءَ بی این ایم ءِ سر ءَ بیڑ آرتگ ، بی این ایم ءِ راھشون ءُ باسکانی نگٹ کنگ ءِ گوں وڑ وڑیں رپکاں کوشست کرتگ بلے پد ءَ ھم بلوچ راجی زْرمبشت ءِ راھشون ءُ باسک بھ چہ وتی لوٹ ، آجوئی ءُ ھکانی جھد ءَ پشت ءَ نہ کنز اتگ اَنت۔بلوچ راجی زْرمبشت ءِ راھشون ءُ باسکاں مدام وتی راہ ءُ راھبندانی پاسداری کرتگ ءُ وتی جھد یلہ نہ کرتگ ، ایشانی واھگ ءُ ھاٹیگ اے گپ ءِ گواھی ءَ دنت کہ بلوچ راج پہ وتی ھک ءُ آجوئی ءَ ھرچ رنگ ءَ وتی جھد ءِ برجاہ دارگ ءِ واھگ دار اِنت۔اے راھشون ءُ باسکانی وتی سر نْدر کرتگ اَنت ، زندان بیتگ اَنت ءُ ھرچ وڑیں زوراکی اش سگ اتگ ، بلے چہ وتی لوٹ ءَ دست کش نہ بیتگ اَنت۔ایشانی جھد ناں ایوک ءَ پہ بی این ایم ءَ توانمندیں کلوھے بلکیں اے گپ ءِ ھم چیدگ اِنت کہ بلوچ راج ءِ آجوئی ءِ زْرمبشت دارگ نہ بیت۔آیانی دیمونی ءُ داشت بلوچ راج ءِ آجوئی ءِ راہ ءَ رژنائیں درورے ءِ رنگ ءَ مان اَنت۔
اے مراگش ءِ چارگزاری ءِ ڈبو بی این ایم آواران ۔ مشکے ھنکین ءَ گون اَت ، ءُ ھنکین ءِ کماش استاد مھران ءَ جارچینی کرتگ۔
