بلوچ نیشنل مومنٹ ( بی این ایم ) ءِ جارکش ءَ وتی شنگ کرتگیں درشانے ءَ پیشیگیں بنجاھی پترءِ باسک شوکت بلیدھی ءِ درانڈیھ ءَ بیرانی ءَ بژن درشان کرتگ ءُ گوشتگ کہ آئی بیرانی یک ٹوھیں تاوانے۔ بی این ایم آئی راجی جھد ءُ دیمونیاں ستک شانی ندر کنت ءُ آئی ءَ آجوئی زرمبشت ءِ ایماندار، نہ ترس ءُ وپاداریں کارکنے ءِ بستار ءَ یاد کنت۔
جارکش ءَ گوشتگ کہ شوکت بلیدھی ءَ وتی سرجمیں زند پہ بلوچ راجی آجوئی زرمبشت ءَ ببا داتگ۔ درانڈیھی ءِ میان ءَ 4 اکتوبر 2025 ءَ چہ جگر ءِ نادراھی ءِ سوب ءَ بیران بیتگ۔ درانڈیھی ءِ میان ءَ آ باز جیڑہ ءُ جنجالانی آماچ بیتگ۔راجی کارانی پژدر ءَ آئی سر ءَ درانڈیھ ءَ ھم آئی ایس آئی ءِ کارمنداں ارش کرتگ۔ مئی 2024 ءُ اگست 2024 ءَ آئی ءِ سر ءَ ارش کنگ بیتگ۔ اے ارشانی آسر ءَ آ سکا ٹپی بیتگ۔ آئی بیرانی بابت ءَ ھمے شک کنگ بیت کہ آئی ءَ پاکستان ءَ چہ وتی کارمندانی رد ءَ زھر وارینتگ۔ چہ آئی جوانیں کرد ءِ سوب ءَ آئی کھول ھم چہ پاکستانی پوج ءُ گوں آئی ءَ ھمگرنچیں چیریں ادارھانی نیمگ ءَ بیھار ءُ زوراکیانی دیمپان بیتگ۔
جارکش ءِ رد ءَ شوکت بلیدھی بلیدہ میناز ءِ جاہ منند اِنت۔ بی این ایم ءِ شھیدیں کارکن التاپ بلیدھی آئی زامات اِنت۔ سال 2008 ءَ شھید نواب اکبر ھان بگٹی ءِ شھیدی ءَ دومی سالروچ ءِ درگت ءَ پر ایمنیں زھرشانی روانکے ءِمیان ءَ ریاستی پوجءَ التاپ بلیدھی شھید کرتگ۔ اے ویل ءَ شوکت بلیدھی پہ آجوئی زرمبشت ءَ جوانیں کردے ءِ پیلو کنگ ءَ جاڑیگ کرتگ۔ آئی ءَ مزن ھور ءَ وتی کار ءُ زورگار یل داتگ ءُ واتر ڈیھ ءَ اتکگءُ وت ءَ پہ آجوئی زرمبشت ءَ ببا داتگ۔ کیچ ءِ دمگ ءِ سرکماش گچین کنگ بیتگ 2010 ءُ 2014 ءَ پارٹی ءِ بنجاھی کونسل سیشن ءَ بنجاھی پترءِ باسک گچین کنگ بیتگ۔
جارکش ءَ آئی پارٹیءِ کارانی گپ جتگ ءُ گوشتگ کہ شوکت بلیدھی ءَ پہ پارٹی ءَ لیکھی ءُ لبزانکی پڑا جوانیں کرد پیلو کرتگ۔ آئیءَ سنگر شنگکار ءِ بنیاد ایر کرتگ، ماھتاک سنگر بندات کرتگ ءُ بازیں ارزشتداریں کتاب شنگ کرتگ۔ رند ءَ آئی سنگر شنگکار ڈیجیٹل ءِ دروشم داتگ ءُ داں گڈی دم ءَ آئی سنگر ءِ سروکی ءَ بستار ءِ کار کرتگ۔ آئی بے نام ءُ بے تماہ ءَ پارٹی ءِ پیسلہ ءِبیاد ءَ چیریں جاھے ءَ نشتگ ءُ چیر اندری وتی زمہ واری پیلو کرتگ اَنت۔ آئی گوں ناگیگیں جاور ءُ داں گڈی ءَ نادراھی ءِ سوب ءَ ھم نزور بوگ ءَ ابید مدام گوں توکل ءَ کار کرتگ۔ آئی کار پہ پارٹی ءِ آشوبی جھدکاراں مادنیں راہ اَنت۔
آئیءَ گوشتگ کہ شوکت بلیدھی رسانکدر ءِ پڑا بلوچ ءُ گوں آدگہ ایردستیں راجانی میان ءَ رھوت ودی کرتگ۔ ایشی آسر ءَ وت ماں وتیں کمک ءُ آجوئی زرمبشت ءِ کار دراجکش بیتگ اَنت۔ درانڈیھی ءِ میان ءَ آئی پارٹی ءِ پیسلہ ءِ رد ءَ رسانکدر ءِ زمہ واری شریں وڑے ءَ پیلو کرتگ اَنت۔
جارکش ءَ گوشتگ کہ شوکت بلیدھیءَ درانڈھی، نادراھی ، چہ سرڈگار ءُ آزیزاں دوری درس آجوئی زرمبشت ءَ دیمونیانی درچ اَنت۔ آئی مردمگری، جھد ءُ کار پہ پارٹی ءَ مدام شرپ ءِ نگاہ ءَ چارگ بنت۔ پارٹی ءِ درسیں بھرگ ءُ ادارھاں آئی کمی ءَ مدام مارگ بیت۔ آآجوئی زرمبشت ءَ سکا ایماندار ءُ باکردیں جھدکارے بیتگ۔ آ داں وتی گڈی دم ءَ پہ راجی آجوئی زرمبشت ءِ سوبمندی ءَ نوکیں راہ ءِ درگیجگ ءُ نوکیں درے برجم دارگ ءَ کار ءَ بیتگ۔ آئی بیرانی ءَ بی این ایم ءِ یک انچیں باکردیں ھمبلے گستا کرتگ کہ آئی کار مدامی سروکی، ھمتءُ توکل ءِمنانک اَنت۔
