کیچ: 16 دسمبر 2024 ءَ زور بیگواہ کنگ بیتگیں زمان جان ء سپاھان ءُ ابدُلھسن ء رھمت ءِ زوریں بیگواھی ءِ بگیری ءَ آئی کھول دو روچ اِنت کہ ھوشاپ ءَ سی پییک دگ ءَ زھرشانی ءَ نشتگ ۔ کھول ءِ نیمگ ءَ زھرشانی روانکے ھم کشگ بیتگ۔ اے وھد ءَ زھرشانی نندانکءَ بازیں کچے ءَ مردم نشتگ اَنت۔
زھرشانی ءَ نشتگیں مردمانی گوشگ اِنت کہ مئے زھگ دمگی چیئرمین ھوتمان ءَ برتگ ءُ ریاستی ادارھانی دست ءَ داتگ اَنت آیانی زوریں بیگواھیءَ مرچی نوہ روچ سرجم اِنت کہ انگت ءَ ھچ وڑیں ھال نیست۔ بس مارا پہ آزیزانی یل کناھینگ ءِ بس مارا دلبڈی دیگ بوگ ءَ اِنت۔ ھمک روچ ھمے گوشگ بیت مرچی نہ باندا شمئے زھگ یل کنگ بنت بلے انگت ءَ پہ مئے زھگانی یل کناھینگ ءَ ھچ وڑیں گامگیج زور گ نہ بیتگ۔
آئی ءَگوشتگ کہ مرچی دو روچ اِنت زھرشانی نندانک برجاہ اِنت دوشی انتزامیہ اتکگ ءُ مارا دروگیں دلبڈی داتگ کہ شما دگ ءَ پچ بہ کن اِت ما داں دو رچ ءَ شمئے زھگاں یل کناھین ایں۔ ما ھمے گوشتگ کہ تو مارا نبشتہ بہ کن ءُ بدے کہ داں دو روچ ءَ مئے زھگ یل کنگ بنت گڑا آئی نبشتہ نہ کرتگ ءُ گوشتگ من تھنا شمارا زبانی گوشاں منی گپ ءَ سر ءَ ستک بہ کن اِت۔
آئی ءَ گوشتگ دانکہ مئے زھگ یل کنگ نہ بیتگ اَنت ما وتی زھرشانی ءَ برجاہ دار ایں، اگاں مئے گپ اد ءَ گوش دارگ نہ بوت گڑا ما اسلام آباد ءَ ھم رویں ءُ زھرشانی کن ایں۔
