کولواہ: مالار ءَ بلوچ وومن پورم ءِ نیمگ ءَ شھید بانک کریمہ ءِ یات ءَ برجم داشتگیں مراگش ءَ ڈاکٹر شلی بلوچ ءَ تران کرتگ ءُ گوشتگ کہ بانک کریمہ بوگ ارزاں نہ اِنت، بانک کریمہ ءَ مات بزاں لمہ ءِ نام چہ مزنیں پندے ءِبرگ ءَ پد رستگ۔ اگاں کریمہ مرچی مات ءِ نام ءَ توار کنگ بیت گڑا آئی ھمک بلوچ ءَ را ماتے ءِ چم ءَ چارتگ۔ کریمہ بلوچ ءِ ھما جنک بیتگ کہ آ ریاست ءِ ھمک زوراکی ءِ دیمءَ اوشتاتگ۔ آئی ءَ سارتءُ گرم نہ چارتگ بس جنزاں بیتگ، آ کدی ھم یکیں جاہ ءَنہ نشتگ۔
آئی ءَ گوشتگ کہ کریمہ چوناھا کیچ ءَ جاہ منند بیتگ بلے آچہ کیچ ءَ گیش بلوچستان ءِ آدگہ ھند ءُ دمگاں گندگ بیتگ۔ چہ کیچ ءَ بگر داں آواران، کراچی ءُ آدگیں جاھاں ترءُ گرد کنگ ءَ بیتگ ءُ بلوچ ءَرا بلوچ بوگ ءِ سکین ءَ دیگ ءَ بیتگ۔ بلوچءَ پہ راجی نپءُ سیتاں یکجاہ کنگ ءَ بیتگ کہ بلوچ پہ وتی سرڈگار ءَ بہ جیڑ ایت۔
ڈاکٹر شلی ءَ گوشتگ کہ شھید بانک بلے مرچی مئے میان ءَ ساڑی نہ اِنت بانک ءَ ھما واب کہ دیستگ اے درست بانک اَنت ءُ آئی پگر ءَ دیم ءَ بر اَنت۔ ریاست ءَ ھمے جیڑ اتگ کہ من بانک ءَکشاں آئی لیکہ اوشت ءِ آماچ بیت بلے چوش نہ اِنت مردم کشگ ءُبندیگ بنت بلے آیانی لیکہ کدی ھلاس کنگ نہ بنت۔
آئی ءَ گوشتگ کہ شھید بانک ھما جاہ ءَ وت ءَ سر کرتگ کہ اود ءَ راہ نہ بوتگ ءُگاڑی نہ شتگ اَنت۔ کریمہ سائیکل ءُ ھشترانی سر ءَ سپر کرتگ یا پیادگ ءَ شتگ بلے وت ءَ لس مھلوک ءِ تہ ءَ سر کرتگ۔ ریاستءَ پہ بانک ءِ دارگ ءَ بیھار دیگ ءُ پندل سازی کرتگ بلے بانک پد کنز نہ بیتگءُ مھکم بیتگ۔ بانک ءَ وتی شھیدیں سنگتانی لاش دیستگ اَنت ءُ سنگت زندانی کنگ ءَ دیستگ اَنت بلے بانک انگت ءَ جنزاں بیت۔
