آواران: زور بیگواھیں دلجان ءِ کھول ءِ نیمگ ءَ آئی زوریں بیگواھی ءِ بگیری ءَ مرچی یازدہ روچ اِنت کہ آواران دمگدار ءِ کارگس ءِ دیم ءَ زھرشانی نندانک برجاہ اِنت۔
زھرشانی نندانک ءَ تربت سول سوسائٹی ءِ سروک گلزار دوست، بلوچ وومن پورم شال ھنکین ءِ سروک سلتانہ بلوچ ءُ آدگہ مردم جنین ءُ زھگ بازیں کچے ءَ نشتگ اَنت۔
زھرشانی ءَ نشتگیں مردمانی گوشگ اِنت کہ اے یازدھیں روچانی میان ءَ ما گوں جتائیں ھیلھاں ترسینگ بوتگ ایں ءُ بازیں رند ءَ مئے گون ءَ کول کنگ ءُ دروگیں دلبڈی دیگ بوتگ، بلے داں مرچی دلجان ءَ آجو کنگ ءَ نہ اَنت۔ 25 نومبر ءَ انتزامیہ ءَ مئے گون ءَ گپ ءُ تران کرتگ ءُ کول کرتگ کہ داں پنچ روچ ءَ دلجان ءَ آجو کن ایں۔
آئی ءَ گوشتگ کہ اگاں دلجان آجو نہ بوت گڑا ما وتی زھرشانی ءَ گیش کن ایں ءُ گڑا ایشی درسیں زمہ واری گپ ءُ ترانی ٹولی ءِ سر ءَ بیت۔ مئے نندانک داں دلجان ءِ آجوئی ءَ برجاہ بیت۔
آئی ءَ لوٹ کرتگ ءُ گوشتگ کہ بلوچستان سرکار، سیاسی ءُ چاگردی کارکن، نودربر گل ءُ مردمی ھکانی گل پہ دلجان ءِ آجوئی ءَ وتی کرد ءَ پیلو بہ کن اَنت۔
