بلوچ نیشنل موومنٹ ءِ سرکماش ڈاکٹر نسیم بلوچ ءَ ماں رسانکدر ایکس ءَ نبشتگ کہ استاد واھد کمبر وتی زند پہ بلوچ راج ءِ آجوئیءَ ندر کرتگ۔ اے سپر ءِ تہ ءَ آئی ءَ وڑ وڑیں جنجال دیستگ۔ وتی سپر ءِ تہ ءَ آئی ءَ زانت ءُ زانگ ءِ تالان کنگ ءِ ھم کار کرتگ، آ پمشکا استاد گوشگ بیت اِنت۔
ڈاکٹر نسیم ءَ گوشتگ کہ مرچی ناشراں استاد آوار جتگ ءُ بیگواہ کرتگ۔ آ پیسرا ھم بیگواہ بیتگ اَت ءُ آزار ءِ سگ اِتگ۔
بی این ایم ءِ سرکماش ءَ گوشتگ کہ آئی ءَ وتی زند ءِ گیشتریں بھر پہ مئے شمئے وشیں باندات ءَ گوازینتگ۔ مرچی مئے ءُ شمئے سرا پرز انت کہ ما استاد ءِ آوار جنی ءُ زور بیگواھی ءِ بگیری ءَ توار چست بہ کن ایں۔
