تُربَت: چہ آپسر ءَ پاکستانی لشکر ءَ دست ءَ زوربیگواہ کرتگیں سَے براتاں ھوار شش زوربیگواھیں مردمانی کھولاں تربت پریس کلب ءَ پریس کانپرنس کرتگ ءُ وتی مردمانی آجوئی ءِ لوٹ کرتگ۔
زوربیگواھیں مردمانی کھولاں گوں اھوالکاراں تران کرتگ ءُ گوشتگ کہ دہ دسمبر ءَ پاکستانی لشکر ءَ سَے برات اھسان ء منزور، اپزل ء منزور ءُ ھامد منزور آوار جتگ بُرتگ اَنت کہ انگت بیگواہ انت۔
پریس کانپرنس ءَ یک دگہ جنینے ءَ تران کرتگ ءُ گوشتگ کہ منی کھول ءِ سے مردم زوربیگواہ کنگ بوتگ۔ چہ آیاں یکے شمس الدین اِنت کہ چار سال پیش پاکستانی لشکر ءَ چہ تُربَت ءَ آوار جتگ کہ انگت بیگواہ اِنت۔
آئی گوشتگ کہ ھمے ماہ ءَ منی کھول ءِ دگہ دو مردم آوار جنگ ءُ بیگواہ کنگ بوتگ کہ چہ آیاں یکے ءِ نام شھاب اِنت ھژدہ روچ پیش پاکستانی لشکر ءَ چہ گس ءَ آوار جتگ ءُ بُرتگ ءُ دگہ یکے ابدُلوھاب اِنت کہ پنچ روچ پیش آوار جنگ ءُ بیگواہ کنگ بیتگ۔
آیاں گوشتگ کہ مئے مردمانی سر ءَ اگاں بُھتامے ھست گڑا آمیدگس ءَ پیش بہ کنگ بہ بنت داں کہ کانودی بنیاد ءَ آیان ءَ سزا دیگ بہ بیت، اگاں بے میار اَنت گڑا یل کنگ بہ بنت۔
آیاں گوشتگ کہ اے پریس کانپرنس ءِ بنیاد ءَ ما کیچ ءِ انتزامیہ ءَ سرپد کنگ لوٹ ایں کہ داں دو روچ ءَ مئے مردم آجو کنگ بہ بنت، اگاں نہ مارا آیانی بابت ءَ سرپدی بہ بنت، اگاں مارا سرپدی دیگ نہ بوت نہ بوت گڑا ما لاچار بہ ایں کہ زھرشانی بہ کن ایں۔
آیاں گوشتگ کہ ما سی پیک ءَ ھوار دگہ جتاھیں جاھاں دگاں بند کن ایں ءُ زھرشانی ءَ نند ایں۔
