زور بیگواھیں استاد واھد کمبر ءِ جنک شاری کمبر ءَ ماں چاگردی رسانکدر ایکس ءَ وتی جارے ءَ گوشتگ کہ استاد واھد کمبر یک رھشونے ءُ آجوئی جھد ءِ چیدگ اِنت۔ آئی زوریں بیگواھی نہ ایوک ءَ پہ کھول ءَ بلکیں پہ سرجمیں راج ءَ یک درناکیں وئیلے، استاد واھد کمبر وتی سرجمیں زند پہ ایردستیں بلوچ ءِ ھک ءَ ببا داتگ ءُ مرچی وت زوراکیانی آماچ اِنت۔ مارا درساں پہ آئی آجوئی ءَ توار چست کنگی اِنت ءُ جھان ءَ ھمے کلوہ دیگی اِنت کہ زوراکیانی بگیری ءَ اوشتگ مئے درسانی زمہ واری انت۔
آئی ءَ گوشتگ کہ بیا اِت 12 دسمبر ءِ بیگاہ ءِ سے ءَ داں شش ءَ چاگردی رسانکدر ءَ بھر بزور اِنت ءُ وت ءَ ھوار بہ کن اِت۔اے ایوک ءَ پہ استاد واھد کمبر ءِ آجوئی ءَ نہ اِنت پہ درسیں بیگواھیں مردمانی آجوئی ءَ اِنت، انساپءُ انسانیت ءِ پلہ مرزی ءَ بہ کن اِت۔ شمئے توار پہ ایردستاں سلاھے، بے توا ر مہ بہ اِت بیا اِت ما درس ھواری ءَ پہ استاد واھد کمبر ءِ آجوئی ءَ جھان ءَ توار جن ایں۔
