چہ کراچی ءِ ھند ھسن اسکوائر ءَ زورگریں پاکستانی لشکر ءَ دوشی یک ءَنیشنل ڈیموکریٹک پارٹی (این ڈی پی ) ءِ بنجاھی پتر ءِ باسک مئراج شاد، دودا الاھی، گمشاد ءُ مزمل آوار جتگ ءُ بیگواہ کرتگ اَنت۔
بنشون ءِ رد ءَ بیگواھیں دودا الاھی کیچ ءِ ھند بلنگورءِ جاہ منند اِنت، گمشاد مند، مزمل پسنی ءُ مھران تربت آپسر ءِ جاہ منند اِنت۔ اے درس کراچی ءَ وانگ ءَ بوتگ اَنت۔
چوش کہ دودا الاھی ءُ گمشاد چہ ایشی پیش ھم 7 جون 2022 ءَ چہ کراچی ءِ ھند مسکن چورنگی ءَ آوار جنگ بوتگ اَنت ءُ پد ءَ 14جون ءَ یل کنگ بوتگ اِت اَنت۔
کراچی ءِ ھند نیول ءَ دوشی زورگریں پاکستانی لشکر ءُ چیریں ادارھانی کارمنداں بیڑ برتگ ءُ اسماھیل ء ابراھیم نامیں مردمے آوار جتگ ءُ بیگواہ کرتگ۔ زور بیگواھیں اسماھیل مند ءِ میتگ گوّک ءِ جاہ ،منند اِنت آ مزن ھورءَ کار ءَ بوتگ دو ماہ بیت اتکگ ، آ پادے ءَ پرشتگ کہ پہ پاد ءِ الاج ءَ شتگ کہ بیگواہ کنگ بوتگ۔
اھوالکار ءِ رد ءَ چہ پنجگور ءِ ھند پروم ءَ زورگریں پاکستانی لشکر ءَ امان اللہ ء سدیک نامیں مردمے بیگواہ کرتگ۔ دو روچ ءَ پیش آئی برات ھلیل ھم لشکر ءَ آوار جتگ ءُ بیگواہ کرتگ، پہ وتی برات ءِ جست ءُ پد ءَ لشکر ءَ بنجل ءَ شتگ کہ لشکر ءَ آئی برات یل داتگ ءُ جند داشتگ۔
