گودادر: زور بیگواھیں امیر بکش ءِ جنک سدپ امیر ءَ گوشتگ کہ منی پت امیر بکش 4 اگست 2014 ءَ چہ کلانچ ءَ زور بیگواہ کنگ بوتگ انگت بیگواہ اِنت۔ چہ آئی زوریں بیگواھی ءَ مئے تیوگیں کھول رنجانی دیمپان اِنت۔ ما نہ تھنا چہ آئی زوریں بیگواھی ءِ درداں جنجال ایں بلکیں اے زوراکی ءَ مارا چہ انسانی ھکّاں زبھر کرتگ۔
آئی ءَ گوشتگ کہ ما وانگجاہ ءَ ونت نہ کن ایں، مئے سرجمیں زندگی ازاب اِنت ءُ ھمک روچ گوں جنجالاں گوز ایت۔ پت ءِ زوریں بیگواھی ءِ انچیں رنجے کہ ھمک وھد ءَ گیش تورینگ ءَ اِنت۔ چہ آئی زوریں بیگواھی ءَ مئے کھول ءِ یک دمانے پہ ایمنی نہ گوستگ۔
سدپ امیر ءَ گوشتگ کہ دہ دسمبر ءَ انسانی ھکّانی میان استمانی روچ اِنت ءُ اے روچ ءَ گوں درسیں انسانی ھکُانی گل، چاگردی کارکن ءُ گوں لس مردماں لوٹ کن آں کہ اے روچ ءَ گوں منی پت امیربکش ءَ ھوار پہ درسیں بیگواھیں مردمانی نام ءَ بدار اَنت۔
آئی ءَ گوشتگ کہ اے روچ ءَ ھما مردمانی دیریگیں بیگواھی ءِ بگیری ءَ توار چست بہ کن اَنت کہ آیاں دیر اِنت چہ وتی کھولاں گستا اَنت، ءُ آیانی بابت ءَ کس نہ زانت کہ چون ءُ کج ءَ اَنت۔ گوں آیاں چے بوگ ءَ اِنت۔
