کراچی: شش اکتوبر ءَ کراچی بالی پَٹ سگنل ءِ نزیک ءَ پدائی اُرشے ءَ دو چینیءَ ھوار سَے مردم مُرتگ ءُ ھبدہ ٹپی ءُ باز گاڑی سُتکگ ءُ پُر بیتگ اَت۔
پدائی اُرش ءِ زمہ واری بی ایل اے ءَ منّ اِتگ ءُ گْوشتگ اَت کہ اے اُرش بی ایل اے ءِ مجید برگیڈ ءِ پدائی شاہ پھد پنام آپتاب ءَ کُرتگ۔
اُرش ءَ پد ریاست ءِ ادارھاں دو مردم دزگیر کُرتگ ءُ گْوشتگ اَت کہ پدائی اُرش ءَ کمکار بیتگ اَنت۔ چہ ایشاں یکے ءِ نام جاوید ءُ دومی ءِ نام گل نسا اِنت۔جاوید ءَ یکبرے ریاست ءِ ادارھانی کارمند آوار جنگ ءَ پد بیگواہ کن اَنت ءُ پد ءَ ھمے کیس ءِ بنیاد ءَ دیم ءَ کار اَنت ءُ آمیدگس ءَ پیش کن اَنت۔ آمیدگس آئی ءَ پولیس ءِ دست ءَ دنت کہ پولیس گیشیں پٹ ءُ پول بہ کنت۔
کراچی پولیس ءِ گْوشگ اِنت کہ ما آیانی لوگ ھم درگِپتگ۔ لوگ پی آئی بی کالونی ءَ کْوھنیں سبزی منڈی ءَ اِنت کہ داں ھشت ماہ ءَ پدائی اُرشکار ھمد ءَ نشتگ ءُ اُرش ءِ تیاری یے کُرتگ۔اے لوگ آئی ءَ پہ باڑہ گون بیتگ۔لوگ ءِ باڑہ دوازدہ ھزار کلدار بیتگ ءُ لوگءِ دو کوٹی اَنت۔
پولیس ءِ گْوشگ اِنت کہ لوگ ءَ بالی پٹ ءِ نکشہ، ڈی این اے سیمپلز ءُ شورہ، گُد ءُ نکلی مود دزکپتگ کہ زاننت پہ چار ءُ ٹپاس کنگ ءَ ایر کنگ بیتگ اَنت۔
پولیس ءِ گْوشگ اِنت کہ دزگیر کُرتگیں جنین گل نسا دو رند ءَ ھمے لوگ ءَ اَتکگ ءُ جاوید داں ھشت ماہ ءَ ھمد ءَ نشتگ ءُ اُرشکار ءِ مستریں کمکار بیتگ۔
آئی ءِ گْوشگ اِنت کہ گاڑی چہ بلوچستان ءَ شورہ ءَ پُر کنگ ءُ آرگ بیتگ۔ آدگہ چیز ھمد ءَ ھست بیتگ اَنت۔گوں دزگیر کُرتگیں مردماں دو گند ءُ نند بیتگ ءُ انگت جُست ءُ پُرس برجاہ اِنت۔
