کلات: زورگریں پاکستانی لشکر ءِ دست ءَ زور بیگواہ کنگ بوتگیں سید ھیسن شاہ ءُ سید اکتر شاہ ءِ کھول ءَ زھرشانی ءَ شال کراچی شھدگ بند کرتگ۔ زھرشانی ءَ سیاسی ءُ چاگردی کارکناں ھوار مردماں بازیں کچے ءَ بھر زرتگ۔
چہ زھرشانی ءَ زور بیگواھیں سید ھسین شاہ ءِ جنک ءَ تران کنان ءَ گوشتگ کہ منی پت سید ھسین شاہ پاکستانی لشکر ءَ ھشت روچ پیش آوار جتگ ءُ بیگواہ کرتگ کہ انگت ءَ بیگواہ اِنت۔ منی برات سید اکتر شاہ ءَ دو ماہ بیت کہ لشکر ءَ مئے گِس ءَ بیڑ برتگ ءُ آوار جتگ۔ منی پت ءُ برات دوئیں بے میار اَنت
آئی ءَ گوشتگ کہ منی پت ءُ برات بیگواہ کنگ بوتگ اَنت گڑا آمیدگس ءَ چی ءَ آرگ ءُ پیش کنگ نہ بنت، آمیدگِس چی ءَ جوڑ کنگ بوتگ؟ منی پت ءُ برات ءَ چونیں میارے کرتگ کہ آ آمیدگِس ءَ پیش کنگ نہ بنت۔
آئی ءَ گوشتگ دانکہ منی پت ءُ برات آجو کنگ یا آمیدگس ءَ پیش نہ بوتگ اَنت گڑا ما وتی زھرشانی ءَ برجاہ دار ایں۔
