آواران: پاری زورگریں پاکستانی لشکر ءِ دست ءَ زور بیگواہ کنگ بوتگیں بلوچ ھان ءِ لوگبانک ءَ گوشتگ کہ ھان ء گلام جان جھمنند پیراندر آواران 4 جولائی 2023 ءَ پاکستانی لشکر ءَ وتی بنجل ءَ لوٹائینتگ ءُ بیگواہ کُرتگ۔ چہ ایشی پد کھول ءَ آئی باروا ھچ وڑیں سرپدی دیگ نہ بیتگ ءُ ما نہ زانیں کہ کجام میار ءِ بنیاد ءَ بیگواء کنگ بیتگ۔
آئی ءَ گوشتگ کہ چہ وتی جود ءِ زوریں بیگواھی ءَ بگر داں انوں ما ھما اِنت کہ سک تکانسریں۔مدام ما پریشانیں۔ من وتی زھگاں گنداں نہ نان وارت کن اَنت ءُ نہ سیریں وابے ءَ وپت کن اَنت۔ما سرجمیں گِس ءِ مردم سسائی نادراہ جوڑ بیتگیں۔
زور بیگواھیں بلوچ ھان ءِ لوگبانک ءَ گوں بلوچ راج، ھند ءِ مھتر، سیاسی،چاگردی ءُ مردمی ھکانی گلاں دزبندی کُرتگ کہ آ پہ ھان ءِ آجوئی ءَ توار چست بہ کن اَنت۔
آئی ءَ گوشتگ کہ سرکار پہ مردمگری ءِ بنیاد ءَ بلوچ ھان ءَ یل بہ کنت، اگاں آئی سر ءَ چونیں بھتامے ھست گڑا آمیدگس ءَ پیش کنگ بہ بیت۔
