کیچ: کولواہ ءَ زورگریں پاکستانی لشکر ءِ کارمند وت ماں وت مڑ اتگ ءُ داں دیر ءَ تیرگواری اِش کرتگ۔۔
اھوالکار ءِ رد ءَ مرچی سھب ءَ کولواہ ءِ میتگ شاہ ءُ باتل ءَ برجاھیں پاکستانی لشکر ءِ پانگس ءَ پاکستانی لشکر ءِ کارمند وت ماں وت مڑ اتگ اَنت ءُ تیرگواری اِش کرتگ۔ تیرگواری ءِ آسر ءَ جانی تاوان ءِ ھال اِنت۔ وت ما وتیں میڑ ءِ میان ءَ چہ جیرک پانگس ءَ پاکستانی لشکر ءِ کارمند اتکگ اَنت ءُ جنگ اِش سلاہ کرتگ۔
ھندی بنشون ءِ رد ءَ زی ءَ زورگریں پاکستانی لشکر ءِ کارمنداں کولواہ ءَ ھور ءُ گراڈی ءِ کِر ءُ کشاں لشکرکشی کرتگ ءُ گسانی پٹ ءُ پول کنگ ءِ ھواری ءَ مردمانی موبائل ھم برتگ اَنت۔
انگت ءَ دگہ آوارجنی ءِ ھال نیست اے باروا مئے جست ءُ پرس برجاہ اِنت۔
