بلوچ اسٹوڈنٹس ایکشن کمیٹی ءِ جارکش ءَ وتی شنگ کرتگیں درشانے ءَ گوشتگ کہ بساک ھب ھنکین ءِ نیمگ ءَ لسبیلہ پریس کلب ءِ دیم ءَ جنگ بوتگیں دو روچی کتاب میڑہ ءِ سر ءَ پولیس ءَ بیڑ برتگ ءُ اود ءَ ساڑی ئیں ھمبل ترسینتگ اَنت ءُ آ نشان کرتگ اَنت ءُ کتاب میڑہ پہ زور ھلاس کناھینتگ۔ یک نیمگے ءَ چاگرد ءِ زھگ پہ کتاب زورگ ءَ چہ دوریں ھنداں اتکگ اَنت ءُ کتاب زورگ ءَ بوتگ اَنت دومی نیمگ ءَ پولیس ءِ کتابانی گوں زور ءُ ناشری ءَ دور کنگ سکا بژن ءُ شرم ءِ گپے۔
آئی ءَ گوشتگ کہ مرچی بُک اسٹال ءِ دومی روچ ءَ پولیس بازیں کچے ءَ پریس کلب ءَ سر بوتگ اَنت ءُ پہ میڑہ ءِ ھلاس کنگ ءَ لاچار اِش کرتگ ءُ ھمے گوشتگ اِش کہ پریس کلب ءِ اے جاہ ءَ کتاب میڑہ ءِ موکل نیست۔ وھدے کہ پولیس سروگان ءَ جست اِش گپتگ کہ مارا نمدی یا نوٹیپکیشن ءَ پیش بدار اود ءَ نبشتگ بہ بیت، آئی ءَ گوشتگ کہ من وت بس آں۔
جارکش ءَ گوشتگ کہ اے کتاب پاکستان ءِ ھمک شھر ءِ کتابجاھاں پہ ارزانی دست کپ اَنت، بلے بلوچستان ءَ کتاب میڑہ جنگ ءُ زانت ءِ تالان کنگ ءِ سر ءَ پابندی اِنت۔ اے نہ تیوک ءَ وانگ دژمنی یے بلکیں بلوچ دژمنی یے۔ اے ڈیھ ءُ سرکار نہ لوٹ اَنت کہ بلوچ بوان اَنت ءُ بلوچ چاگرد ءِ تہ ءَ زانت گیش بہ بیت۔
آئی ءَ گوشتگ کہ پولیس ءِ نیمگ ءَ پہ زور کتاب میڑہ ءِ ھلاس کنگ ءُ اے وڑیں ناشرکاری ءُ وانگ دژمنی ءِ رویشت ءَ گوں ترندیں دانکاں ایر جن آں ءُ زمہ واراں گوں تچکی ءَ گوش ایں کہ ما بلوچستان ءَ پہ زانشت ءِ تالان کنگ ءِ جھد ءَ یک گامے پدکنز نہ بہ ایں۔
