کیچ: پاکستانی پوج ءَ شھید پدائی زرینہ رپیک پنام ترانگ ماھو ءِ پت ماسٹر رپیک ءُ ھدا داد آوار جتگ ءُ بیگواہ کرتگ۔
زرمبش جگھیر ءِ رد ءَ پاکستانی پوج ءَ شھید زرینہ ءِ پت ماسٹر مھمد رپیک ء روشن زی تربت ءَ لوٹائینتگ ءُ بیگواہ کرتگ۔ آئی دگہ نزیکیں سیادے ھدا داد ء سومار زی تربت ءَ چہ گس ءَ آوار جتگ ءُ بیگواہ کرتگ۔
ھندی بنشون ءِ رد ءَ پاکستانی پوج ءَ چہ مھمد رپیک ءِ آوار جنگ ءَ پد تجابان سنگ آباد ءَ آئی گس ءَ بیڑ برتگ ءُ گوں مردماں زوراکی کرتگ۔
شھید پدائی زرینہ رپیک پنام ترانگ ماھو پرندوشی نوکنڈی ءَ بلوچستان لبریشن پرنٹ ءِ سدو مری آپریشنل بٹالین ( سوب ) ءِ کاروائی ءَ ھوار بیتگ۔
چہ بی ایل ایپ ءِ نیمگ ءَ آئی اکس شنگ کنگ بوتگ ءُ جارکش ءِ گوشگ اِنت کہ پہ سوب ءِ کاروائی ءِ پیلو کنگ ءَ جند ندری زرینہ رپیک پنام ترانگ ماھو پہ کمپاؤنڈ ءِ مزنیں دروازگ ءِ پروشگ ءَ وت ءَ کربان کرتگ ءُ سوب ءِ آدگہ سنگت کمپاؤنڈ ءِ تہ ءَ پترگ ءَ سوبین بیتگ اَنت۔
اے بابت ءَ میجر گھرام بلوچ ءِ گوشگ اِنت کہ بی ایل ایپ ءِ اسپیشنل ٹولی، سدّو آپریشن بٹالین ( سوب ) ءِ سرمچاراں گوستگیں سی ءُ شش ادار اِنت کہ نوکنڈی ءَ برگیڈ ھیڈ کوارٹر ءِ میان ءَ سیندک ءُ ریکوڈک شوربندی ءِ دری مردمانی کارگس ءُ گسانی کمپاؤنڈ دستیگ کرتگ۔
آئی ءَ گوشتگ کہ اے میان ءَ پاکستان ءِ زمینی ءُ برزی پوج ءَ بزاں ایس ایس جی کمانڈواں کمپاؤنڈ ءِ پد ءَ پہ دستیگ کنگ ءَ باز جھد کرتگ، پد ءَ ھما چہ سرمچارانی پسھی ارشانی سوب ءَ پدکنز اتگ اَنت۔ گوستگیں دو روچانی میان ءَ جنگاں کشگ بوتگیں بازیں پوجیانی لاش انگت ھمود ءَ ایر اَنت۔
میجر گھرام بلوچ ءَ گوشتگ کہ بی ایل ایپ رسانکدر ءِ پارست ءَ ھمے جار ءَ جنت کہ دزگیر کرتگیں دری مردماں اگاں چونیں ھم تاوانے بوت آئی زمہ واری پاکستان ریاست ءِ سر ءَ بیت۔
