بلوچ وومن پورم ءِ جارکش ءَ وتی شنگ کرتگیں درشانے ءَ گوشتگ کہ دلجان بلوچ 12 جون 2024 ءَ چہ آواران تیرتیج ءَ بیگواہ کنگ بوتگ روچ ء مروچی آئی ءِ ھچ وڑیں ھال نیست۔ پہ دلجان ءِ آجوئی ءَ ھمک ھما در ءَ کہ اوستے بوتگ آئی ءِ کھول شُتگ، بلے چہ بے اوستی ءَ ابید دگہ ھچ نہ رستگ۔
آئی ءَ گوشتگ کہ 3 اکتوبر ءَ پہ دلجان ءِ آجوئی ءَ آواران دمگدار ءِ کارگس ءِ دیم ءَ آئی ءِ کھول ءَ 3 روچ ءَ ننداک ھم داتگ بلے سے روچ ءَ پد آ ھمے اوست ءَ پاد کنگ بوتگ اَنت کہ شمے مردم زوت یل کنگ بیت بلے انگت آئی ءِ ھچ وڑیں ھال نیست۔
آئی ءَ گوشتگ کہ دلجان ءِ کھول ءَ زی آواران ءَ زھرشانی روانکے کش اتگ ءُ دمگدار ءِ کارگس ءِ دیم ءَ ننداک ھم داتگ ءُ سُھبی آواران کراچی دگ ھم بند کتگ، بلے آواران دمگدار ءِ نیمگ ءَ کھول زیکین ءِ ترسینگ بوگ ءَ اِنت کہ پاد بیا اِت اگاں پاد نیاتک اِت ما شمارا تاوان دئیں ءُ بازار ءِ دُکاندار ھم بیھار دیگ بوتگ اَنت کہ ایشان آں ٹینٹ مہ دے اِت۔ دوشیگین ءِ آ آزمان ءِ چیرا نشتگ اَنت۔
آئی ءَ گوشتگ کہ مروچی آواران ءِ نیٹورک ھم بند کنگ بوتگ ءُ مئے مردمانی گون ءَ ھچ وڑیں ھال بوگ ءَ نہ اِنت۔ اگاں اے مردمانی تہ ءَ کسے ءَ ھم چیزے بوت ایشی ءِ زمہ وار دمگی واکدار اِنت ، بلوچ وومن پورم آواران ءِ واکدار ءِ رویشت ءَ گوں ترندی ءَ ایر جنت، کھول ھرچ پیمیں سوڑگے زور ایت ما آئی ءِ ھمراہ داری ءَ کن ایں۔
