بلوچ آجوئی لوٹوکیں سروک رھیم ایڈوکیٹ ءَ ماں چاگردی رسانکدر ایکس ءَ وتی درشانے ءَ گوشتگ کہ بیگواھیں بلوچانی توار ( وی بی ایم پی ) ءِ شدکشیں زھرشانی گدان ءِ ماندارگ پاکستانی لشکر ءِ دگہ یک ناشریں کاروائی یے۔ وی بی ایم پی ءِ اے گدان کم چہ کم پانزہ سال ءَ پیش شال پریس کلب ءِ ماڑی ءِ دیم ءَ جنگ بوتگ ءُ سرکار ءِ گیشیں زوراکیاں ابید پہ زور بیگواھیں مردمانی آجوئی ءَ برجاہ اِنت۔ اے اولی بر نہ اِنت کہ چیریں ادارھانی کارمنداں وی بی ایم پی ءِ گدان مانداشتگ بلکیں چہ ایشی کمو پیش وی بی ایم پی ءِ گدان ءِ سر ءَ پاکستان ءِ پھاداریں لشکر ءُ آئی کارمندانی نیمگ ءَ باز بر ءَ اُرش ءُ ماندارگ بوتگ۔ بی وائی سی، وی بی ایم پی، بلوچ نودربر ءُ بلوچ ءِ لس مردمانی بگیری ءَ اے وڑیں وتگڑیں ھیلہ ءِ کارمرز کنگ زورگریں ریاست پاکستان ءُ آئی اے پھازداریں لشکر ءِ بے اوستی ءَ پدر کنت۔
آئی ءَ گوشتگ کہ پاکستان ءِ زوراکیں سرکار ءُ آئی اے لشکر ءَ زانگ لوٹ ایت کہ آ چہ اے وڑیں رستری ھیلھانی کارمرز کنگ ءَ بلوچانی توکل، گھگیری ءُ توار ءَ دارگ نہ بیت۔ بلے نوں پدر اِنت کہ بلوچ کجام ھم وڑ ءَ بلوچستان ءِ سر ءَ چہ پاکستان ءِ زورگپتی ءَ آجو بوگ ءَ پر ھاٹیگ اِنت۔ زوریں بیگواھی ءُ آدگہ مردمی ھکانی بگیریاں ھوار بلوچ چکچینی ءِ بگیری ءَ بلوچانی توار مھکم بوتگ کہ ریاست یا ریاست ءِ سروکی ءَ برجاھیں چہ کشندہ ٹولی ءِ پارست ءَ اے دارگ نہ بنت۔ ریاست ءِ آزادھی، زوراکی ءُ پندل سازی ھمک بر ءَ مردمی ھکانی لگتمالیانی بگیری ءَ بلوچ ءِ گھگیری ءَ ھوار بلوچ ءِ آجوئی جھد ءِ دارگ ءَ بے سوب بوتگ۔
بلوچ سروک ءَ گوشتگ کہ مردمی ھکانی پھازدار ماہ رنگ ءِ بگیری ءَ پاکستان ءِ انوگیں دروگیں پندل سازی تکشام ءُ وی بی ایم پی ءِ گدان ءِ آس دیگ ءَ بلوچ جھد ءِ نزور کنگ ءِ کوشت بے سوبیں جھدے زانگ بیت۔
