تربت: چہ بلیدہ ءَ زورگریں پاکستانی لشکر ءِ دست ءَ زور بیگواہ کنگ بوتگیں ورنا شیرجان ءُ ارشاد ءِ کھول ءِ نیمگ ءَ پہ آیانی زوریں بیگواھی ءِ بگیری ءَ شھید پدا اھمد چاراہ ءَ زھرشانی نندانک برجاہ اِنت۔
کھولانی گوشگ اِنت کہ گوستگیں شپ ءَ پاکستانی لشکر ءَ بازیں کچے ءَ مئے گِساں بیڑ برتگ ءُ دوئیں ورنا آوار جنگ ءَ پد بیگواہ کرتگ اَنت۔ چہ ایشی پد ما پولیس گس ءُ آدگہ ادارھانی کِر ءَ شتگ ایں اے ورنا آیانی کِر ءَ نہ بوتگ اَنت۔
آئی ءَ گوشتگ کہ اگاں مئے زھگاں چونیں میارباری یے بہ کرتیں گڑا آیان ءَ کانود ءِ پارست ءَ میاربار گوشتگ ءُ دزگیر کرتگ اَت۔ آ شپ ءِ تھارونکی ءَ آوار جنگ ءُ بیگواہ کنگ بوتگ اَنت ما نزانیں کہ آ کئی کِر ءَ بندیگ اَنت ءُ کجام میار ءَ آوار جنگ بوتگ اَنت۔
زور بیگواھیں ورنایانی کھولاں لوٹ کرتگ ءُ گوشتگ کہ اگاں مئے زھگ دیم ءَ آرگ ءُ آجو کنگ نہ بوت اَنت گڑا ما لاچاریں کہ دگاں بند بہ کن ایں گڑا ایشی درسیں زمہ واری واکدار ءِ سر ءَ بنت۔
آیاں گوں مردمی ھکانی ادارہ ءُ سیاسی پارٹیاں لوٹ کرتگ کہ آ پہ زور بیگواھیں شیرجان ءُ ارشاد ءِ باروا توار چست بہ کن اَنت ءُ پہ آیانی آجوئی ءَ وتی کرد ءَ پیلو بہ کن اَنت۔
