کیچ: مند ءِ میتگ مھیرءَ پاکستانی لشکر ءِ نیمگءَ گسانی دستیگ کنگ ءِ بگیری ءَ زھرشانی نندانک ءَ مرچی شش روچ سرجم بوتگ کہ انگت برجاہ اِنت۔ چارشمبے ءِ روچ ءَ بلوچ یکجھتی کمیٹی ءِ سروک وسیم سپر ءُ آدگہ مردم پہ کھول ءِ ھمدردی کنگ ءَ اتکگ اَنت۔
چہ زھرشانی نندانک ءَ بی وائی سی ءِ سروک وسیم سپر ءَ تران کرتگ ءُ گوشتگ کہ اد ءَ شش روچ اِنت کہ زھرشانی نندانک برجاہ اِنت ادءَ جنیانی ھواری ءَ کسانیں زھگ ھم نشتگ اَنت۔ ادءَ زھرشانی پمیشکا کنگ بوتگ کہ مند ءِ مھیر ءَ پاکستانی لشکر ءَ مردمانی گس دستیگ کرتگ اَنت ءُ اے مردم چہ گساں کشگ بوتگ اَنت۔
آئی ءَ گوشتگ کہ پنچ سال اِنت اے مردم در پہ دری ءِ زندگی ءَ گوازینگ ءَ اَنت، اے گوستگیں پنچ سالانی میان ءَ ایشان ءَ جتائیں وھداں تھنا وھد دیگ بوتگ کہ شمئے گس ھالیگ کنگ بنت بلے یل کنگ نہ بوتگ اَنت۔ اے مردم لاچار بوتگ اَنت کہ چہ یک نومبر ءَ زھرشانی ءَ نشتگ اَنت۔
وسیم سپر ءَ گوشتگ کہ اے زھرشانی نندانک ءَ پیرزال ءُکسان کسانیں زھگ نشتگ اَنت بلے انگت ءَ چہ سرکار ءِ نیمگ ءَ پہ آیانی لوٹانی منگ ءَ ھچ وڑیں گامگیج زورگ نہ بوتگ۔ من گوں بلوچ راج ءَ لوٹ کن آں کہ آ بلوچستان ءَ پاکستانی لشکر ءُ چہ آئی ادارھانی زوراکیاں بے توار مہ بنت۔
