شال: سے سال پیش چہ بلوچستان زانشتجاہ ءَ زورگریں پاکستانی لشکر ءِ دست ءَ زور بیگواہ کنگ بوتگیں نودربر سھیل ءُ پسی ءِ زوریں بیگواھی ءِ بگیری ءَ بلوچ اسٹوڈنٹس ایکشن کمیٹی ءِ نیمگ ءَ دو روچی زھرشانی نندانکے برجم دارگ بوتگ ءُ مرچی گڈی روچ ءَ چہ بلوچستان زانشتجاہ ءَ داں شال پریس کلب ءَ زھرشانی روانکے کشگ بوتگ۔
زھرشانی روانک ءَ نودربر، سیاسی، چاگردی ءُ مردمی ھکانی ادارھانی کارمنداں ھوار جتائیں بھرگاں سیادی داروکیں مردماں بازیں کچے ءَ زرتگ۔
زھرشانی کنوکیں مردماں زور بیگواھیں نودربر سھیل ءُ پسی ءِ اکس، بینرز، پلے کارڈ دستاں بوتگ اَنت۔ آیاں زوریں بیگواھیانی بگیری ءَ اوگام جتگ ءُ بیگواھیں مردمانی آجوئی ءِ لوٹ کرتگ۔
بساک ءِ سروکانی گوشگ اِنت کہ یک نیمگے ءَ بلوچ نودربرانی زوریں بیگواھی ءِ بگیری ءَ زھرشانی کنگ بوگ ءَ اِنت ءُ دومی نیمگ ءَ چہ اسلام آباد ءَ دہ نودربر آوار جنگ ءُ بیگواہ کنگ بیت اے بژنی گپے۔
آیاں گوشتگ کہ واکداریں مردم گوں بلوچ راج ءِ زندمان ءَ ھون ءِ لیب ءَ کنگ ءَ اَنت۔ زوریں بیگواھی یک سکا مزنیں جیڑھے ایشی نہ تیوک ءَ ایر جن ایں بلکیں ما بلوچ نودربرانی زوریں بیگواھی ءِ بگیری ءَ گھگیری ھم کن ایں۔
