بلوچ اسٹوڈنٹس ایکشن کمیٹی ءِ جارکش ءَ وتی شنگ کرتگیں درشانے ءَ گوشتگ کہ گل ءِ گوستگیں ھنکین ءِ زمہ دار ءُ دلیریں سیاسی جھدکار سنگت ھمیدہ ءِ بیرانی ءَ پدرد ایں۔ سنگت ھمیدہ گل ءِ اوتل ھنکین ءِ گوستگیں کمک کارمستر بیتگ ءُ وتی نودربر سیاست ءِ تہ ءَ سرگرمیں ءُ کار ئیں سنگتے اَت کہ مُدام پہ بلوچ نودربرانی سیاسی ھیلکاری ءُ سیاسی جھد ءَ اولی سرپ ءَ اوشتوک اَت۔ آئی ءَ چہ لوامز اوتل ءَ پولیٹکل سائنس ءَ گریجویشن کتگ ءُ بنیاتی سیادی آواران ءِ میتگ تیرتیج ءَ بیتگ۔ آ سیاسی جہدکارے ءَ ھوار جوانیں نبشتہ کارے ھم بوتگ۔ ما آئی ءِ جھد ءُ زِند ءِ کموکیں ساھتاں گوں سیاسی سِنچ ءُ سما ءَ گوازینتگیں زِند ءَ دروت ندر کن ایں۔
آئی ءَ گوشتگ کہ سنگت ھمیدہ گوستگیں لھتے سالاں شومُک ءِ نادرھی ءِ آماچ بیتگ ءُ پہ درمان ءَ نادراہ جاہ ءَ درمان کنگ ءَ بوتگ اَت۔ اے نادراھی ءِ گرانیں ساھتاں آ زِند ءُ مرگ ءِ میان ءَ گوں سکیاں مڑگ ءَ اَت کہ گُڈسر ءَ کراچی ءَ وتی ساھے دات اَنت۔ نادراھی ءِ ساھتاں ھم آئی ءِ پگر ءُ جزبگ چو مھکمیں کلات ءَ بُرز ءُ توانا اِت اَنت ءُ مدام ھمے گوشگ ءَ اَت کہ نادراھی ءَ شر بہ باں رواں پہ راج ءَ وتی جھد ءَ برجاہ داراں۔ مرگ ءُ زِند ءِ میان ءَ گوزوکیں بلوچ پُسگانی چو مھکمی ءُ تمردی ءَ پہ بلوچ راجی جھد ءَ اوشتگ مئے راجی سِنچ ءُ سما ءِ سوبینی ءُ بدواہ ءِ مرگ اِنت۔ اے گرانیں ساھتاں ھم آئی ءِ جزبگ ءُ پگر پہ راج ءَ جھد کنگ، دلیریں، مھکمیں ءُ کا ئیں سیاسی جھدکارے ءِ نشانی اَنت۔
آئی گوشتگ کہ بلوچستان ءَ شریں نادراہ جاہ ءُ الکاپیں تبی آسراتی نہ بیگ ءِ سوب ءَ بلوچ راج چہ جوانیں پُسگ ءُ سیاسی جھدکاراں زبھر بیگ ءَ اِنت۔ شومُک ءِ نادراھی بلوچستان ءَ گوں انچو تیزی ءَ تالان بیگ ءَ اِنت کہ پہ اشی ءِ گِر ءُ دار ءَ نہ شھمیں نادراہ جاھے ھست ءُ ناکہ دگہ آسراتی یے۔ جاور انچو جوڑ بیتگ اَنت کہ شومک ءِ نادراھی ءَ ھوار یک کسانیں نادراھی یے درمان ھم بیت نہ کنت ءُ نازاکیں انسانی ساھاں پُل ایت۔ اگاں مارا شھمیں تبی آسراتی بیتیں بلوچ پُسگ چو گُشادی ءَ مرگ ءِ ارجان نہ بیتگ اِت اَنت بلے بلوچ یک انچیں سیاہ شپے ءَ گِپتگ کہ کسانیں نادارھی ءُ ویلے ھم آئی ءَ گوں مرگ ءَ دیمپان کنت۔
آئی ءَ گوشتگ کہ گل نمیرانیں سنگت ءِ جھد ءُ پگر ءَ دروت ندر کنت ءُ آئی ءِ کرد ءَ پہ دگراں جھد ءُ کار ءِ چیدگ جوڑ بیگ ءَ سکین ءَ دنت۔ سنگت ھمیدہ ءِ وڑیں سیاسی جھدکار پہ بلوچ ءِ ایدگہ نودربر ءُ جھدکاراں مزنیں درور بہ بنت کہ بلوچ پُسگانی گور ءَ مرگ ءِ سھت ءَ ھم بلوچ، بلوچی ءُ بلوچستان ءِ پگر مھکم ءُ توانا بہ بیت۔
