اسلام آباد: بلوچ یکجھتی کمیٹی ءِ نیمگ ءَ برجاھیں زھرشانی نندانک ءَ پولیس ءِ زواراکی برجاہ اَنت۔ اسلام آباد پولیس زھرشانی ءَ نشتگیں مردمانی وردن، کمبل، ٹینٹ ءُ آدگہ ساماناں نندانک جاہ ءَ برگ ءَ نیلگ ءَ اِنت۔
بنشون ءِ رد ءَ چہ بلوچستان ءِ جتائیں ھند ءُ دمگانی زوربیگواھیں مردمانی کھول اسلام آباد ءَ آھگ ءُ بلوچ یکجھتی کمیٹی ءِ نیمگ ءَ برجاھیں زھرشانی ءَ بھر زورگ ءَ اَنت۔
زھرشانی ءَ نشتگیں مردمانی گیش بوگ ءِ سوب ءَ زھرشانی ءَ نشتگیں مردماں مرچی ٹینٹ ءُ نپاد ءُ زورتگ ءُ زھرشانی نندانک ءَ روگ ءَ بوتگ اَنت کہ اسلام آباد پولیس ءَ ٹینٹ ءُ سامانی دارگ ءِ جھد کرتگ۔
اسلام آباد پولیس ءِ گوشگ اِنت کہ زھرشانی ءَ نشتگیں مردم پہ وت ءَ چونیں سامان ءُ وردن زور اَنت گڑا الّم مارا موکل بگر اَنت، ابید ءِ موکل ءَ ما ھچ سامان ءَ اد ءَ آرگ ءَ نیل ایں۔
یات بہ بہ اِت کہ بلوچ یکجھتی کمیٹی ءِ نیمگ ءَ برجاھیں زھرشانی ءَ سی ءُ نوہ روچ اِنت سرجم بوتگ انگت برجاہ اِنت۔ زھرشانی کنوکیں مردماں یازہ روچ بیت اسلام آباد پریس کلب ءِ دیم ءَ زھرشانی ءَ نشتگ اَنت۔ چہ واکدارانی نیمگ ءَ آیانی لوٹانی منگ ءَ اَبید زھرشانی ءَ نشتگیں مردم روچ پہ روچ گیشیں جنجالانی دیمپان کنگ بوگ ءَ اَنت۔
![](https://zrumbesh.com/wp-content/uploads/2024/01/IMG-20240102-WA0089.jpg)