چہ ھب چوکی ءَ پاکستانی لشکر ءِ دست ءَ زور بیگواہ کنگ بوتگیں جنید ھمید ءِ گھار ءَ لسبیلہ پریس کلب ءَ پریس کانپریس کرتگ ءُ گوشتگ کہ 8 اکتوبر ءِ شپ ءَ دہ ءِ نزیک ءَ ھب بوانی شاہ پمپ ءِ نزیک ءَ منی برات جنید ء ابدالھمید ءَ سے گاڑیانی سر ءَ یک درزنے ءِ کچ ءَ سلاہ بندیں مردماں آوار جتگ ءُ گوں وت برتگ۔
آئی ءَ گوشتگ کہ منی 28 سالیگیں برات جنید ابدالھمید ھمے باپاری شھر ھب ءَ یک شرکتے ءَ نوکر اِنت ءُ تیوگیں ھند ءِ مردم ھمے گپ ءِ گواھی ءَ دے اَنت کہ منی برات گوں ھچ وڑیں سیاسی یا آدگہ مذھبی سرگرمیاں ھوار نہ بوتگ۔
گھار ءَ گوشتگ کہ منی برات چہ ھما جاہ ءَ آوار جنگ بوتگ اود ءَ دگہ مردم ھم ساڑی بوتگ اَنت ءُ آیاں ھال داتگ پد ءَ ما زوت پولیس ءُ آدگہ مردمان ءَ آئی زوریں بیگواھی ءِ باروا سھی کرتگ اَنت۔
آئی ءَ گوشتگ کہ بلوچستان ءِ مھلوک زاناں مردم نہ اَنت؟ چہ جھان ءِ مردمی ھکانی کانود بلوچستان ءَ بوت نہ کنت؟ پہ مردمی ھکاں ٹاپار جنوکیں گل ءُ سیاسی ٹولی یا سرکار ءَ انچو توان ءُ واک نیست کہ زندگیں مردمانی کوش ءِ بگیری ءَ گامگیج بہ زور اَنت؟ چے بلوچستان ءِ مردم وتی سرجمیں زند ءَ گوں ھمے آزاراں بہ گوازین اَنت؟
جنید ھمید ءِ گھار ءَ گوشتگ کہ بلوچستان ءِ ھمک مردم ءِ یک جتائیں دردناکیں کسھے، کسے ءِ زھگ بیگواہ اِنت، کسے ءِ برات، کسے ءِ جود بیگواہ اِنت یک کھولے ءِ چمانی نور ھمے سسائی نادراھیانی آماچ اِنت ءُ پہ وتکشی کنگ ءَ لاچار اِنت۔ بلوچستان ءَ ھما مردم کہ زور بیگواہ کنگ بیت ایشی ھما مردم زمہ وار اَنت کہ اے زوراکیانی بے تواری ءَ ندارگ کنگ ءِ کرد ءَ پیلو کنگ ءَ اَنت۔
آئی ءَ لوٹ کرتگ ءُ گوشتگ کہ سرکار ءُ سرکار ءِ لشکری ادارہ منی برات ءَ زوت آجو بہ کن اَنت،گوں ایشی ھوار ما گوں مردمی ھکانی ادارھاں لوٹ کن ایں کہ آ منی برات جنید ء ابدالھمید ءِ زوریں بیگواھی ءَ دلگوش ءَ گور بہ کن اَنت ءُ پہ آئی آجوئی ءَ مئے گون ءَ کمک بہ کن اَنت۔
گھار ءَ گوشتگ کہ پریس کانپریس ءِ گڈی ءَ ھمے گوش آں کہ اگاں جنید آجو کنگ نہ بوت ما کھول لاچار بہ ایں زھرشانی بہ کن ایں۔
