کوھلو: گوستگیں روچ ءِ زورگریں پاکستانی لشکر ءِ دست ءَ زور بیگواہ کنگ بوتگیں مھمد اکبر مری آجو بوتگ۔
اھوالکار ءِ رد ءَ مھمد اکبر ءِ سر ءَ ھمے بھتام اِنت کہ آئی بلوچستان ءِ بیرک وتی پرپٹ ءَ جتگ ءُ چہ پاکستانی لشکر ءِ دیم ءَ گوستگ، آئی تامربند جوڑ کرتگ ءُ رسانکدر ءَ شنگ کرتگ۔ مھمد اکبر مری ءَ پاکستانی لشکر ءَ باز آزار داتگ۔
بنشون ءِ رد ءَ مھمد اکبر مری ءِ پیرزالیں مات پہ وتی زھگ ءِ آجوئی ءَ پاکستانی لشکر ءِ کِر ءَ شتگ گڑا ایپ سی ءِ کمانڈر ءَ گوشتگ کہ تئی زھگ پریس کانپریس ءِ رد ءَ وتی ردی ءَ بہ من ایت گڑا آجو کنان ئِے۔
رند ءَ مھمد اکبر مری گوں وتی برات ءِ ھمراھی ءَ پریس کانپریس کرتگ ءُ گوشتگ کہ گوستگیں روچ ءَ من پہ وتی شوک ءَ موٹر سائیکل ءِ سر ءَ بلوچستان ءِ بیرک بستگ ءُ تامربند جوڑ کرتگ من ایشی پھلی ءَ لوٹ آں۔
