بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ وتی شنگ کرتگیں درشانے ءَ گوشتگ کہ بی ایل ایپ ءِ سرمچارا ں 7 اکتوبر ءِ بیگاہ ءِ پنچ ءَ بالگتر ءِ ھند تش ءَسی پیکءَ پاکستانی پوجءِ یک چوکی یے ءِ سر ءَ گوں نوک ءُ ٹوھیں سلاھاں ارش کرتگ داں سے ادار ءَ گیش برجاہ بیتگ۔ سرمچاراں گوں سوبمندی ءَ چوکی دستیگ کرتگ ءُ اود ءَ ایریں پوجی سامان دستیگ کرتگ اَنت۔ اےارش ءِ آسر ءَ چاردہ کارمند مرتگ ءُ چار سکا ٹپی بیتگ۔
آئیءَ گوشتگ کہ چوکیءِ دستیگ کنگ ءَ پد پہ زورگریں پوج ءِ کمک ءَ چہ پنجگور ءَ زوت کمک ءَ آھوکیں چار گاڑی ارش جاہ ءِ نیمگ ءَ روگ ءَ بیتگ اَنت کہ آیاں دو کواڈ کاپٹر ءُسرویلینس کیمرہ ءِ برزی کمک گوں بیتگ، بلے سرمچاراں گوں جوانیں جنگی شوربندیاں سنگر گپتگ ءُ کمکی پوج نشانگ کرتگ چہ ایشی آسر ءَ پوجی کارمند پہ پدکنزگ ءَ لاچار بیتگ اَنت۔ ھمے میانءَ سرمچاراں دو کواڈ کاپٹر ءُ یک سرویلینس کیمرھے جتگ ءُ دور داتگ۔ ھمے سوبمندیں کاروائی ءَ گوں گل ءَ ھمگرنچیں کربان یونٹ ءِ یک باز جوان، لائک ءُ نہ ترسیں سنگتےابداللہ پنام سوگات گوں نہ ترسی ءَ جنگ دیان ءَ شھید بیتگ۔
جارکش ءَ گوشتگ کہ ابداللہ میار یک سالے پیش گل ءَ ھوار بیتگ ءُ چہ وتی جھد، جپاکشی ءُ جنگی بودناکیانی سوب ءَ گل ءِ بنداتی یونٹ کربان یونٹ ءِ بھرے بیتگ۔
آئی ءَ گوشتگ کہ شھد ابداللہ میار گل ءِ بازیں مزنیں جنگاں بھر زرتگ، آئی تربت، پروم، کولواہ، گورکوپ، جاھو، شاپک ءُ بالگتر ءَ وتی پرز پیلو کرتگ ءُ بالگتر ءِ مزنیں جنگ ءَ شھید بیتگ۔
جارکش ءَ گوشتگ کہ گل پہ راجی آجوئی ءَ کربان بیتگیں شھید ابداللہ میار پنام سوگات ءَ ستک شانی ندر کنت ءُ آئی مول بلوچستان ءِ آجوئی اِنت ءُ ما پہ آئی مول ءِ سرجم کنگ ءَ ھر پیمیں دیمونی دے ایں ءُ آجوئی ءِ مول ءَ سوبین بہ ایں۔
آئیءَ گوشتگ کہ بی ایل ایپ ءِ سوبمندیں چیر جنگی کاروائیاں ریاست سسائی پارستءَ سکا جنجالانی دیمپان کرتگ ءُ سی پیک دگ ءَ برجاھیں زورگریں پوج ءِ نشانگ کنگ گل ءِ جنگی بودناکی ءُ شوربندیانی منانک اِنت۔
جارکش ءَگوشتگ کہ زورگر ءُ لگوریں پوج بلوچستان ءَ سسائی پارست ءَ ھمنچو پرشتگ کہ آ وتی مرتگیں پوجیانی منگ ءَ ھم جاڑیگ نہ اِنت اے آئی پروش ءِ مستریں منانک اِنت۔
میجر گھرام بلوچ ءَ ارش ءِ زمہ واری من اتگ ءُ گوشتگ کہ ھمےکولءَ کن ایں کہ داں بلوچستان ءِ آجوئی ءَ زورگریں دژمن ءِ بگیری ءَ ترندیں ارشاں برجاہ دار ایں۔ گل شھید ابداللہ میار پنام سوگات ءَ راجی آجوئی راہ ءَ شھیدی ءَ ستک شانی ندر کنت۔
