بلوچ آجوئی لوٹوکیں سروک ءُ بلوچ راجی زرمبشت ( بی این ایم ) ءِ پیشیگیں سرکماش ھلیل بلوچ ءَ وتی شنگ کرتگیں درشانے ءَ گوشتگ کہ مرچی پاکستان ءَ پشتون تھپز موومنٹ ءِ سر ءَ پابندی جتگ ءُ یک دگہ سیاسی ءُ گھگیری زرمبشتے ءِ لپاشگ ءِ منانک پیش داشتگ۔ بلوچ ءِ بستار ءَ من اے پابندی ءَ تیوک ءَ یک گلے ءِ سر ءَ نہ بلکیں سرجمیں لس پشتونانی توار ءِ سر ءَ اُرش سرپد باں۔
آئی ءَ گوشتگ کہ اے گامگیج یک انچیں زرمبشتے ءِ آزاردھی ءِ پارست ءَ پہ ھلاس کنگ ءَ جھد ءِ بھر اِنت کہ آ سرجم ءَ ایمنی شوندات ءِ سر ءَ کار کنگ ءَ اِنت۔
ھلیل بلوچ ءَ گوشتگ کہ پی ٹی ایم ریاستی زواکی، درکانودی کوش ءُ زوریں بیگواھی ءِ بگیری ءَ پشتون راج ءِ یک جھگیریں توارے۔ ایشی مدام گوں ایمنی ءَ وتی لوٹ پیش کرتگ اَنت ءُ پہ بنیادی ھکاں جھد کرتگ۔ ایشی سر ءَ پابندی جنگ، راستی ءَ اے درسانی توار ءِ ھلاس کنگ زانگ بیت، کہ آ راجی ھکاں لوٹ اَنت ءُ ریاستی زوراکیاں جھان ءِ دیم ءَ آشکار کنگ ءِ جھد ءَ کن اَنت۔
آئی ءَ گوشتگ کہ ریاستی ناشرکاری ءِ اے درچ تیوک ءَ داں پشتوناں بندوک نہ اِنت، بلوچستان ءَ ما چہ ایشی گنتریں جاورانی دیم پہ دیمی ءَ کنگ ءَ ایں۔ ما اے گپ ءَ شر سرپد ایں کہ پاکستان پہ راجی ھکانی توار ءِ دارگ ءَ چونیں زوراکی کنت۔ پی ٹی ایم ءِ سر ءَ پابندی بلوچستان ءِ جھد ءُ ریاست ءِ زوراکیاں ھم پیش کنت پمشکا کہ دوئیں راج نوک آبادکاری ءِ بنیادی بستار ءَ یک وڑ اَنت بلے جھد ءُ لیکہ ءِ تہ ءَ پرک اِنت۔
ھلیل بلوچ ءَ گوشتگ کہ زور ءِ پارست ءَ لس مردمی ءُ گھگیری زرمبشتانی بے توار کنگ ءِ اے ھیلہ تیوک ءَ مردمانی کینگ ءُ زھرگ ءَ گیش کنت۔ اے وڑیں زوراکیانی آماچیں راج چہ ساری ءَ گیش مھکم ءُ یکجاہ بنت پاد کاینت۔
آئی ءَ گوشتگ کہ اے مئے درسانی زمہ واری بیت کہ ما ھما تواراں زندگ بہ دار ایں کہ پہ انساپ، ھک ءُ آجوئی ءَ جست بنت۔ زوراکیانی بگیری ءَ جھد ءَ بلوچ ءُ پشتونانی یک مزنیں گوستانکے ھست۔ مارا ھوار بوگ ءُ یکجاھی ءَ جھد دیم ءَ برگ لوٹ ایت۔
