بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں تمپ ءُ کوھلو ءَ چار جتائیں اُرشاں زورگریں پاکستانی لشکر ءُ بلوچ راجی مڈیانی بروکیں گاڑی ءُ رھوتی ٹاور نشانگ کرتگ اَنت۔
آئی ءَ گوشتگ کہ بی ایل اے ءِ سرمچاراں دوشی کیچ ءِ ھند تمپ رودبن ءَ یک وھد ءَ دو جتائیں جاھاں زورگریں پاکستانی لشکر ءِ مزنیں بنجل ءُ پانگس اُرشاں نشانگ کرتگ اَنت۔
جارکش ءَ گوشتگ کہ سرمچاراں رودبن بازار ءَ زورگریں پاکستانی لشکر ءِ مزنیں بنجل ءِ سر ءَ گوں راکٹ لانچر ءُ آدگہ نوکیں سلاھاں اُرش کرتگ۔ بنجل ءِ تہ ءُ پھازداریں پانگسانی سر ءَ چہ راکٹ ءِ لگگ ءَ دو دژمنیں کارمند جاھی مرتگ ءُ کم چہ کم سے ٹپی بوتگ اَنت۔ وھدے کہ دژمنیں لشکر ءَ گیش مالی تاوان بوتگ۔
آئی ءَ گوشتگ کہ ھمے وڑ ءَ سرمچارانی دگہ یک ٹولی یے ءَ رودبن ءِ شاھاپ دوراھی ءَ برجاھیں زورگریں پاکستانی لشکر ءِ پانگس اُرش ءَ نشانگ کرتگ۔ سرمچاراں دژمنیں لشکر ءِ سر ءَ گرنیڈ لانچر ءِ باز گولا آس داتگ ءُ گوں مزنیں سلاھاں اُرش کرتگ۔ اُرش ءِ آسر ءَ کم چہ کم دو دژمنیں کارمند ٹپی بوتگ اَنت۔
جارکش ءَ گوشتگ کہ بی ایل اے ءِ سرمچاراں 25 ستمبر ءَ کوھلو ءِ ھند چمالنگ ءَ بلوچ راجی مڈیانی لٹ ءُ پل ءَ ھواریں یک گاڑی یے گوں چیر کرتگیں شورھانی اُرش ءَ نشانگ کرتگ ایشی آسر ءَ ھمے گاڑی سکا تاوان بوتگ۔
آئی ءَ گوشتگ کہ چمالنگ ءِ کِر ءُ کشاں زورگریں پاکستانی لشکر ءِ سروکی ءَ بلوچ راجی مڈیانی لٹ ءُ پل ءَ ھواریں مردماں تچکی ءَ گوش ایں کہ بی ایل اے راجی مڈیانی لٹ ءُ پل ءَ کس ءَ موکل نہ دنت، دیم ءَ مئے اُرش ترند بنت۔
جارکش ءَ گوشتگ کہ بی ایل اے ءِ سرمچاراں دگہ یک اُرشے ءَ کوھلو ءُ کاھان ءِ میانجی ءِ ھند بالا ڈھاکہ ءَ 18 ستمبر ءَ یک راھوتی ٹاورے نشانگ کرتگ ءُ تباہ کرتگ۔
جیھند ءَ اُرشانی زمہ واری منّ اتگ ءُ گوشتگ کہ ھمے کول ءَ کن ایں کہ داں بلوچ سرڈگار ءِ آجوئی ءَ مئے سلاہ بندیں گھگیری برجاہ بیت۔
