پنجگور: مرچی سھب ءَ زورگریں پاکستانی لشکر ءِ دست ءَ زور بیگواہ کنگ بوتگیں دوئیں برات سابر نور ءُ آبد نور ءِ کھول ءِ نیمگ ءَ آیانی زوریں بیگواھی ءِ بگیری ءَ زھرشانی ءَ چین پاکستان اکنامک کوریڈور ( سی پیک) سرادک ءَ زم زم ھوٹل ءِ نزیک ءَ بند کنگ بوتگ۔
زھرشانی ءَ کھول، سیاسی ءُ چاگردی کارکناں ھوار جتائیں بھرگاں سیادی داروکیں مردماں بازیں کچے ءَ بھر زرتگ۔ دگ ءِ بند بوگ ءِ سوب ءَ دوئیں نیمگاں گاڑی اشتوک بوتگ اَنت۔
کھول ءَ مرچی پریس کانپریس ءِ رد ءَ گوشتگ اَت کہ اگاں مئے زھگ داں روچ ءِ دو ءَ یل کنگ نہ بوت اَنت ما زھرشانی ءَ سی پیک دگ ءَ بند کن ایں۔
یات بہ بہ اِت کہ اے دوئیں برات مرچی سھب ءَ پاکستانی لشکر ءَ چہ پنجگور ءِ ھند تار آپس ءَ بیڑ برتگ ءُ آوار جتگ اَنت۔
