شال: پہ زور بیگواھیں مردمانی پدجنگ ءَ وی بی ایم پی ءِ شدکشیں زھرشانی گدان ءَ 5590 روچ سرجم بوتگ۔ یک شمبے ءِ روچ ءَ دھانل، ارسلان ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ زوریں بیگواھی، ژانوگولیں لاشانی چگل دیگ، سیاسی کارکنانی نشانگ کنگ، آبادیانی سر ءَ اُرش کنگ زورگریں ریاست ءِ مدام کار اَنت۔ بلے تیز ھما وھد ءَ بیت کہ بلوچ راجی زرمبشت جتائیں بھرگاں سرگوز کنت ءُ دیم ءَ جنز ایت گڑا ریاست ترس آماچ بیت ءُ زوراکی ءِ سیمسر ءَ گواز کنت انچوش کہ برجاہ اِنت۔
آئی ءَ گوشتگ کہ وی بی ایم پی ءِ رد ءَ چہ 2000 ءَ بگر داں انوں ھپتاد ءُ پنچ ھزار بلوچ پسگ زور بیگواہ کنگ بوتگ ءُ بندیگجاہ ءَ شھید کنگ بوتگ اَنت۔بیگواھیں مردمانی کھول پہ وتی مردمانی یل نہ کنگ ءُ زوریں بیگواھی ءُ شھیدی ءِ بگیری ءَ وی بی ایم پی ءِ راھبند ءِ رد ءَ گوستگیں پانزہ سال اِنت راجمستری جھد ءِ درسیں وڑ ءُ پیماں کارمرز کنگ ءَ اَنت۔
ماما کدیر گوشتگ کہ زھرشانی روانک، مراگش، آمیدگس ءُ کمیشناں پیش بوگ ءِ ھواری ءَ دراجکشیں شدکشیں زھرشانی گدان برجاہ اَنت۔ چہ ایشاں میان استمانی ادارھانی دلگوش ءِ بلوچستان ءِ نیمگ ءَ کنگ ءُ بلوچستان ءِ جاورانی باروا جوانیں کردے پیلو کنگ ءَ اَنت۔ اے دراجکشیں ایمنیں جھد مردمی ھکانی گلاں ھوار اکوام متھدہ ءِ کرد ءِ سر ءَ جستے ودی کنت۔
