بلوچ آجوئی لوٹوکیں سروک ءُ بی این ایم ءِ پیشیگیں سرکماش ھلیل بلوچ ءَ وتی شنگ کرتگیں درشانے ءَ گوشتگ کہ اکوام متھدہ ءِ جنرل اسمبلی ءَ تران کرتگ ءُ مزن وزیر شھباز شریپ ءَ گزہ ءَ اسرائیل ءِ زوراکی ایر جتگ، جھان ءِ کجام ھم کنڈ ءَ مردمی ھونانی ناھک ءَ ریچگ، چکچینی ءُ زوراکی ایر جنگی اَنت۔ بلے کشندہ، زوراکی، چکچینی، ءُ مردمی ھکانی بگیری ءِ ایر جنگ مردمی ھکانی گیشیں بگیری ءُ راجانی چکچینی کنوکیں ڈیھ بہ کنت، اے تچکی ءَ مناپکی ءُ دوتل ءُ دو پوستی اِنت۔ اے مان نیارگ نہ بیت۔
آئی ءَ گوشتگ کہ شھباز شریپ اے پاکستان ءِ وتگڑیں مزن وزیر اِنت آ بلوچ راج ءِ چکچینی ءَ کنگ ءَ اِنت۔ آئی لشکر بلوچ سرڈگار ءِ سر ءَ مردمی ھکانی گیشیں بگیری ءَ کنگ ءَ اِنت۔ اسرائیل ءِ سر ءَ نگد کنوکیں پاکستان ءِ مزن وزیر ءِ ریاست، لشکر ءُ چیریں ادارہ بلوچستان ءَ ھوار آدگہ راجانی بگیری ءَ جنگی میارباری کنگ ءَ اَنت۔ ھزارانی کچ ءَ زور بیگواھیں بلوچ چہ سالاں پاکستانی لشکر ءِ چیریں آزار جاھاں آزار اوپار کنگ ءَ اَنت۔ آیانی کھول پہ وتی آزیزانی آجوئی ءُ انساپ ءَ درد پہ در اَنت۔ مرچی بلوچستان ءَ تچک ءَ شوربندی ءِ پارست ءَ چکچینی ءُ لٹ ءُ پل برجاہ اِنت۔ اے ڈیھ ءِ مزن وزیر کجام دیم ءَ دگہ کسے ءِ زوراکیاں ایر جنت؟
راجدوستیں سروک ءَ گوشتگ کہ ما بلوچ، پلستینی لس مردمانی درداں شریں وڑے ءَ مارگ ءَ ایں چی ءَ کہ ما وت چہ دراجکشیں وھدے ءَ ریاستی ناشرکاری ءُ زوراکیانی آماچ ایں۔ بلے یک زوراکیں ڈیھے ءِ مزن وزیر دومی ءِ ھکانی گپ ءَ کنت گڑا آ سکا گوں تچکی ءَ مناپکی کنگ ءَ اِنت۔
ھلیل بلوچ ءَ گوشتگ کہ میان استمانی تک ءَ لوٹ ایت کہ آ اکوام متھدہ ءِ وڑیں میان استمانی ادارھے ءِ منشور ءِ پارست ءَ چونیں ھم سوھوئی ءَ ابید درسیں زوراکیں ڈیھانی گون ءَ یک وڑ ءَ پیش بہ بیت ءُ پاکستان ریاست ءِ دست ءَ بیوکیں مردمی ھکانی پادمالیاں ھمے وڑ ءَ میان استمانی تک ءَ پلستین ءِ وڑ ءَ ھک ءِ توار چست کنگ بہ بیت۔
