بلوچ اسٹوڈنٹس ایکشن کمیٹی ءِ جارکش ءَ گوشتگ کہ 22 ستمبر 2024 ءَ بلوچ اسٹوڈنٹس ایکشن کمیٹی کراچی ھنکین ءِ سنگت الیاس بُنزہ ءِ نیمگ ءَ کارمستر نومان ءِ سروکی ءَ دیوانے برجم دارگ بوتگ۔ دیوان ءِ گچینی مھمان ءِ ھنکین ءِ کارمستر زیشان ءُ کُمک کارمستر ھمل بوتگ اَنت
آئی گوشتگ کہ دیوان ءِ اولی بھر ھنکین ءِ سرکیولر بوتگ کہ کہ آئی ءِ تہ ءَ ھنکین ءِ کمک کارمستر ءَ دیوان ءِ تہ ءَ ھنکین ءِ پیش کرتگ ، سوڑگ ءُ پنت نامگ سنگتاتی نیام ءَ ایر کُرتگ اَنت۔ دومی بُنگپ بُنزہ ءِ گوستگیں ھال بوتگ کہ آئی ءِ تہ ءَ بُنزہ ءِ کارگُشاد ءَ گوستگیں اھوال دیوان ءِ دیم ءَ ایر کُرتگ اَنت۔
آئی گوشتگ کہ سیمی بُنگپ شرگداری بوتگ کہ آئی تہ ءَ سنگتاں جوانیں رنگے ءَ گوستگیں کارانی سر ءَ نگد کُرتگ ءُ اِندگہ نزوریاناں وتی تران ءُ باوستانی تہ ءَ دیوان ءِ دیم ءَ گوں دلجمی ءَ ایر کرتگ اَنت ءُ دیوان ءِ چارمی بُنگپ گَل ءِ کاربوتگ کہ گل کارانی بنگپ ءَ سنگتاں تران کنان ءَ گوشتگ کہ سیاسی گل ءُ مھکمی لیکہ ھروڑیں سیاسی ءُ چاگردی جیڑہ ءِ گیش ءُ گیوار کنگ ءِ بُنکی شئے اَنت۔ یک چاگردے بے کساس نابودیں نزام ءُ ھزاراں نادراھیانی ھلاسی ءِ وسیلہ اِنت ءُ یک مُھکمیں ءُ زمینی راستی ءَ گوں بندوکیں لیکہ ءَ کردی دروشمے ءَ پہ کارمرزگ ءَسیاسی گل ھژدری اَنت کہ مھلوک ءَ ھمے لیکہ ءِ بُنیاد ءَ یک تچکیں ءُ مکدسیں کِشکے ءَ بارت اِنت۔
دیمتر ءَ سنگتاں تران کنان ءَ گوشتگ کہ گوں بساک ءِ تلّو ءَ بندوکیں سنگتانی وشبھتی اِنت کہ گوں بساک ءَ بندوک اَنت ءُ راجدوستی ءِ لیکہ ءِ بُنیاد ءَ نودربر سیاست ءَ جُنزینگ ءَ اَنت بلے مرچی مارا پوہ بُوَّگی اِنت کہ گلانی مُھکمی جُھدکارانی کمٹمنٹ، مُکلسی، کُربانی ءُ گلی ءِ پابند بُوَگ ءِ سوب ءَ چہ بُوتگ بلے مئے جُھد تنیگہ جُنزگ ءَ اِنت ءُ ھمے پیم ماں وتی راجی ڈُبّہ ءِ سر ءَ وتی کِرداں پیلو کنان بہ ایں ءُ گل ءَ کاراں گوں ایمانداری ءَ جُنزان کنان بہ ایں۔
آیاں گُوشتگ کہ نودربر سیاست سیاسی کرد ءِ تہ ءَ ھما nursary اِنت کہ بلوچ ورناھاں پہ وتی سیاسی رُدوم ءُ زانشت ءَ مستریں اسٹیج اِنت، اے ھما سیاسی پروسس اِنت کہ ورناھانی مُھکم ءُ نزریاتی جوڑ کنگ ءِ درس ءِ کاراِنت پمیشکا مارا وتی چاگرد ءِ تہ ءَ ھمُک ورناھاں گوں وتی گل ءَ ھوار کنگی اِنت ءُ نودربر سیاست ءِ پروسس ءِ برورد ءَ چہ (مچی ) سنچ ءَ وتی تہ ءَ ودیگ بکن اَنت ءُ پہ راج ءَ گیش ءَ چہ گیش جُھد بکن اَنت۔
آیاں گُوشتگ چوشکہ ما گندیں کہ بلوچ راج مزنیں کساسے ءَ وانگ ءُ زانگی پڑ ءَ چہ دور اَنت۔ آ چہ وانگ ءَ گیشتِر کاروبار ءَ اَرزشت دیگ ءَ اَنت ءُ اے یک مزنیں پندلے سازگ بیتگ دانکے بلوچ ورنا وانگ ءُ زانگ ءَ چہ زبھر کنگ بہ بنت ءُ چہ چاگردی کردی ءُ پگری راستیاں چہ آشنا مہ بنت۔
آیاں دیمتر ءَ تران کرتگ ءُ گوشتگ چوشکہ سنگت الیاس بُنزہ کراچی ءِ تہ ءَ گُلشن ءُ ڈالمیہ ءِ وڑیں جاھاں کار کنگ ءَ اِنت ھمے بلوچ میتگانی تہ ءَ اِستان ءَ وڑ وڑیں شوربندی کارمرز کُرتگ انچوشکہ وانگ جاہ نیست اَنت اگاں وانگجاہ اَست اَنت ھم جوانیں وڑے ءَ چِک ءُ تان نیست اِنت گڑ ءَ جیڑھانی گیش ءُ گیوار کنگ اے میتگانی تہ ءَ گل ءِ پروگرام ءَ سر کنگ پہ گل ءِ واست ءَ سوبمندی اِنت ءُ مئے جھد ھمے بہ بیت ما اے وڑیں جاھاں وتی پروگرام ءَ سر بکن ایں۔
آئی گوشتگ کہ پنچمی بُنگپ ھندی میان استمانی سیاسی جاور بوتگ کہ آئی تہ ءَ سنگتاں تران کنان ءَ گُوشتگ کہ دُگنیا ءِ سیاسی، روزیگی ءُ جنگی مٹی ھمینکدر گوں تیزی ءَ مٹ بوّگ ءَ اِنت کہ دو ساھت ءَ ھمے چست ءُ ایر سرجمیں دُگنیا ءِ آرڈر مٹی ءُ بدلی کاریت۔
آئی گوشتگ چوشکہ ھزب اللہ ءِ سرا ٹیکنیکل devices آنی ترکگ ءُ بازیں مھلوک اے تراکاں چہ مِرگ ءَ اَنت کہ اے وڑیں شوندات مرچیگیں وھد ءَ جنگانی نوکی ءَ پدّر کن اَنت بزانکہ تو اے گپ ءَ منّ اِت کن ئے کہ cyber warfare ءِ مستریں درور ھمے پیجرز ءُ واکی ٹاکیانی تراک اِنت کہ ھزب اللہ سساءی پروش دیگ ءَ اِنت۔ما ھمے داب ءِ چیزانی سرا جُست ءُ پُرس ءَ باوست بکن ایں داں مار اِت کنیں کہ ما مرچی بلوچ جُھد کار چینکدر وسائل ءُ ھیالانی بُنیاد ءَ پشکپتگ ایں۔
آئی گوشتگ کہ دیوان ءِ شَشُمی بُنگپ آؤکیں گامگیج بوتگ کہ آئی تہ ءَ گوستگیں کابینہ ھلاس کنگءُ نوکیں کابینہ گچین کنگ بوتگ ۔ مھسن کارمستر ، اکمل کُمک کارمستر ، تیمورکارگُشاد ، یونس کُمک کارگُشاد یونس، بابر ھالرسانی کارگُشاد گچین کنگ بوتگ اَنت ءُ ھنکین ءِ کارمستر ءَ نوک گچین کنگ بوتگیں کابینہ ءِ سنگت سوگند داتگ اَنت ءُ گڈسر ءَ نوک گچین بوتگیں کارگُشاد ءَ دیوان ءِ ھلاسی ءِ جار جتگ۔
