سند: وائس پار مسنگ پرسن آپ سند ءِ سروک ءُ شھید ھدایت لوھار ءِ جنک سسی لوھار ءَ وتی تامربندے ءَ سند ءِ شھر لاڑکانہ ءَ زھرشانی کنگ ءِ جار جتگ۔
آئی ءَ گوشتگ کہ 16 پروری 2024 ءَ استاد ھدایت لوھار ءَ ریاستی ادارھانی کارمنداں ناھک ءَ کشتگ، چہ ایشی ءَ پد داں انوں کشندھانی بگیری ءَ ایپ آئی آر کنگ نہ بوتگ ءُ کشندہ دزگیر کنگ نہ بوتگ اَنت۔
سسی لوھار ءَ گوشتگ کہ 17 مارچ 2024 ءَ لاڑکانہ ءَ زھرشانی روانکے کشگ ءَ ایں، گوں لاڑکانہ ءُ کش ءُ گورانی ھند ءُ میتگاں ھوار درسیں سند ءِ سیاسی، چاگردی، راجدوست ءُ مردمی ھکانی کارکنانی گون ءَ لوٹ کن آں کہ زھرشانی ءَ بھر بزور اَنت۔
اے درگت ءَ وائس پار مسنگ پرسن آپ سند ءَ ماں چاگردی رسانکدر ایکس ءَ نبشتگ کہ اکوام متھدہ، ایمنسٹی انٹر نیشنل ءُ جھان ءِ مردمی ھکانی گلانی گون ءَ لوٹ کن ایں کہ کلانھیں راجی کارکن استاد ھدایت لوھار ءِ ریاستی کوش ءِ بگیری ءَ پاکستان ریاست ءَ زوت بہ دنت ءُ ھدایت لوھار ءِ ریاستی کوش ءِ گون ءَ انساپ کنگ بہ بیت۔
