لاھور: پنجاپ زانشتجاہ ءِ بلوچ نودربرانی دزگیری ءُ اسلامی جمیت ءِ نودربرانی نیمگ ءَ لٹ شاپ ءُ زوراکیانی بگیری ءَ زھرشانی روانکے کشگ بوتگ۔ روانک تر ءُ گرد کنگ ءَ پد زانشتجاہ ءِ وی سی کارگس ءِ دیم ءِ مچ بوتگ اَنت ءُ آیانی وتی زھرشانی یاداشتگ۔
زھرشانی کنوکیں نودربراں پلے کارڈ دستاں بوتگ اَنت کہ آیانی سر ءَ جتائیں اوگام نبشتگ بوتگ اَنت۔آیاں جمیت ءِ ناشرکاری ایر جتگ اَنت ءُ بلوچ نودربرانی یل کنگ ءِ لوٹ کرتگ۔
آیاں تران کرتگ ءُ گوشتگ کہ اسلامی جمیت نودربر گل پہ آدگہ درسیں نودربراں سردردے جوڑ بوتگ برے یک راجے ءِ نودربرانی سر ءَ ارش کنگ ءَ اِنت۔ اے مرچیگیں ویلے نہ اِنت ھمک وھد ءَ گوں نودربراں ھمے وڑ کنگ بوگ ءَ اِنت۔ چہ جمیت ءَ ابید ھمک وھد ءَ نودربر واکدار ءِ نیمگ ءَ نشانگ کنگ بنت ءُ گوں آیاں زوراکی کنگ بیت۔
آیاں گوشتگ کہ مئے چنچو نودربر دزگیر کنگ بوتگ اَنت واکدار ءُ پنجاپ پولیس آیانی بیست ءُ چار ادارانی تہ ءَ یل بہ کنت، اگاں نہ گڑا ما وتی زھرشانیاں ترند کن ایں۔ اگاں مئے گپ گوش دارگ نہ بوت اَنت گڑا ما وتی آھوکیں گامگیج ءِ جار ءَ جن ایں۔
