بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ بی ایل اے ءِ سرمچاراں ھاران ءَ زورگریں پاکستا نی لشکر ءِ مزنیں بنجل ءُ شال ءَ ریاستی چاریگ گوں دو جتائیں ارشاں نشانگ کرتگ اَنت۔
آئی ءَ گوشتگ کہ ھاران ءِ ھند البت ءَ برجاھیں زورگریں پاکستانی لشکر ءِ بنجل ءِ سر ءَ سرمچاراں دوشی گوں راکٹ لانچر ءُ آدگہ سلاھاں ارش کرتگ۔ دژمنیں لشکر ءِ پھازداریں پانگس ءَ چہ راکٹ ءِ لگگ ءَ یک دژمنیں کارمندے جاھی مرتگ ءُدژمن ءَ گیش جانی ءُ مالی تاوان بوتگ۔
جارکش ءَ گوشتگ کہ ھمے وڑ ءَ مرچی شال ءِ بروری دگ ءَ کلی ابراھیم زھی ءِ نزیک ءَ زورگریں لشکر ءُ چیریں ادارھانی یک چاریگے مجاھد جاہ منند بھاولپور پنجاپ ءَ تیرگواری کرتگ ءُ کشتگ۔ اے مردم ھجام ءِ دکانداری ءِ دروشم ءَ پہ دژمنیں لشکر ءَ چاریگی کنگ ءَ بوتگ۔ ھجام ء دکان ءَ پہ چاریگی ءَ بندرے ءَ کارمرز کنگ ءَ بوتگ۔
جیھند ءَ وتی درشان ءِ گڈی ءَ گوشتگ کہ بی ایل اے دوئیں ارشانی زمہ واری ءَ من ایت۔
