بلوچ نودربر گل آزاد ( بی ایس او آزاد ) ءِ جارکش ءَ وتی شنگ کرتگیں درشانے ءَ گوشتگ کہ آشوبی شائر مبارک کازی یک بے مٹیں کرد ءُ بے سلاھیں سرمچارے ءِ بستار ءَ دار ایت، آئی چہ وتی شائری ءَ بلوچ راج ءُ زبان ءِ گون ءَ انساپ کرتگ۔ بلوچ ورنایانی راجی زانشت گیش کرتگ ءُ آئی آشوبی شائری ءَ بلوچ زبان ءُ لبزانک ءِ گوں راجی جنز ءَ ھمگرنچ ءَ جوانیں کردے پیلو کرتگ۔ آشوبی شائر کازی ءِ کرد بلوچ راجی زرمبشت ءَ پلستینی آشوبی شائر مھمود درویش ءُ لاتینی امریکہ ءِ شائر پابلو نیروڈا ءِ وڑ ءَ بوتگ۔ آئی ءَ چہ وتی شائری ءَ اود ءَ بلوچی لبزانک دیمروئی داتگ ءُ آئی ءَ بلوچی لبزانک زمینی راستیانی رد ءَ آشوبی کالب ءَ آورتگ ءُ چہ ایشی سوب ءَ مرچی بلوچی لبزانک بلوچی شائری ءِ پارست ءَ پہ بلوچ راجی زرمبشت ءَ جوانیں کرد پیلو کنگ ءَ اِنت۔ بلوچ راجی زرمبشت یک جتائیں بھرگاں ھمگرنچیں زرمبشتے، چہ ایشی بلوچ چاگرد ءِ جتائیں بھرگاں کرد پیلو کنت۔ اے ھمگرنچی ءِ مھکم کنگ ءَ آشوبی شائر ءِ کرد چہ بنداتی روچاں پدر اِنت۔
آئی گوشتگ کہ کجام ھم پہ راجی زرمبشت ءَ چاگرد ءِ درسیں بھرگانی کرد سکا اریشت دار ایت۔ وھدے کہ کجام راج ءِ سر ءَ زورگریں توانمندے اُرش یا جنگے ودی کنت گڑا آ تیوک ءَ یک بھرگے ءَ وتی زوراکی ءُ رستری ءِ نشانگ نہ کنت یا ایردستیں راجے ءِ تہ ءَ زورگر ءِ بگیری ءَ جنگ کنگ ءِ زمہ واری تیوک ءَ یک بھرگے ءِ نہ بیت بلکیں یک زورگرے ءِ بگیری ءَ جنگ کنگ ءِ زمہ واری درسیں مردم ءُ درسیں بھرگاں سیادی داروکیں مردمانی بیت۔ پمیشکا کہ زورگر سرڈگار ءَ دستیگ کنت کہ آ درسانی بیت پمیشکا زورگر ءِ بگیری ءَ جھد کنگ ءِ زمہ واری درسانی سر ءَ بیت۔ بلوچ شائری ءُ لبزانک ءَ ھوار براھوئی شائری ءُ لبزانک مرچی پہ راجی زانشت ءِ ودی کنگ ءَ جوانیں کردے پیلو کنگ ءَ اِنت۔ اے زمہ واری درسیں بھرگاں سیادی داروکیں مردمانی سر ءَ بیت۔ اگاں کسے اھوالکاری کنگ ءَ اِنت یا چونیں ھم بھرگے ءَ بندوک اِنت، بلوچ راجی ایردستی ءِ بگیری ءَ درساں اے جھد ءِ تہ ءَ وتی بھر ھوار کنگی اِنت۔ آشوبی شائر مبارک چہ ریاستی بیھاراں بگر داں گرانیں جاورانی دیم پہ دیمی کرتگ، بلے چہ راج ءُ سرڈگار ءَ آئی مھر کم نہ بوتگ اَنت۔ بلوچی شائری ءِ گھگیری شائری ءِ گون ءَ ھمگرنچ کنگ ھمے مزنیں کارست ءِ سر ءَ روت۔ آئی چہ وتی شائری ءَ بلوچستان ءِ ھمک رنگ ءُ دروشم پیش داشتداتگ اَنت۔ بلوچ گھگیری شائری مبارک کازی ءَ ابید ناسرجم اِنت بلکیں بلوچ گھگیری شائری ءِ دروشم مبارک کازی اِنت۔
آئی ءَ گوشتگ کہ زورگریں ریاستی لشکر ءَ 2014 ءَ آئی گِس ءِ دروازگ ءِ سر ءَ دستی بمب اُش کرتگ، بلے آ چہ ترس آماچ بوگ ءَ ابید آئی ءَ تچکی ءَ گوشتگ کہ آ بلوچستان ءُ چہ بلوچ جھد ءِ گرانکدریں کردارانی سر ءَ شائری ءَ یل نہ کنت۔ آئی ءَ وتی شائری بلوچ راج ءِ ایردستی، ریاستی زوراکی ءُ ناھکی، بلوچ جھد ءِ بے مٹیں کرد ھما وڑ نبشتہ کرتگ اَنت ھمک شئیر بلوچانی دل ءَ نکش اِنت۔ آ شائری ءِ سر ءَ آ زندانی کنگ بوتگ آئی بگیری ءَ ایپ آئی آر نبیسگ بوتگ، آ گوں جتائیں وڑاں ترسینگ ھم بوتگ بلے یک گرانکدریں آشوبی شائرے ءِ بوگ ءِ بنیاد ءَ آ کدی اے باروا بے توار نہ بوتگ، بلکیں راجی جھد ءِ اے گرانبھائیں سپر ءَ مبارک کازی ءِ یکیں بچ ءُ بلوچ شائر ڈاکٹر کمبر مبارک وتی جان ءِ دیمونی داتگ۔
آئی ءَ گوشتگ کہ بزاں مبارک کازی بلوچ شائری ءِ ھما گرانبھائیں چیدگ اِنت کہ داں ابد مان ایت ءُ مدام گیر آرگ بیت۔ وھدیکہ بلوچ ورنا چہ شائراں ھمے اوست ءَ دار اَنت کہ آ مبارک کازی ءِ راہ ءُ لیکہ ءِ سر ءَ برو اَنت ءُ بلوچ سرڈگار ءُ گوں ھاک ءَ وتی وپا ءِ کرد ءَ پیلو بہ کن اَنت۔ بلوچ سرڈگار ءِ سر ءَ زورگپتاں ھما جنگ ودی کرتگ آئی لس مردمانی دیم ءَ بیار اَنت ءُ آیاں چہ ریاستی زورگپتی ءُ بلوچ راجی گھگیری ءُ چہ جھد ءَ سرپد بہ کن اَنت۔
