شال: بیگواھیں بلوچانی توار( وی بی ایم پی ) ءَ ماں رسانکدر ءَ وتی شنگ کرتگیں درشانے ءَ گوشتگ کہ زوربیگواھیں دین مھمد مری ءُ دل جان ءِ کھول ءَ آیانی زوریں بیگواھی ءِ کیس وی بی ایم پی ءِ گور ءَ یاداشت کرتگ اَنت۔
دین مھمد ءِ کھول ءَ گوشتگ کہ دین مھمد مری ء مراد ھان پاکستانی لشکر ءَ 24 اگست ءَ چہ شال ءِ ھند ھزارگنجی ءَ گس ءَ آوار جتگ ءُ زوربیگواہ کرتگ۔
دل جان ءِ کھول ءَ گوشتگ کہ دل جان ء اللہ بکش سرکاری ڈاکٹرے کہ پاکستانی لشکر ءَ 12 جون ءِ شپ ءَ چہ آواران ءِ ھند تیرتیج ءَ مزار آباد ءَ آئی گس ءَ آوار جتگ ءُ بیگواہ کرتگ۔
بیگواھیں مردمانی کھولانی گوشگ اِنت کہ مئے مردمانی زوربیگواھی ءَ پد مارا ءَ آیانی باروا ھچ وڑیں سرپدی دیگ نہ بوتگ کہ مئے مردم چون ءُ کج ءَ اَنت۔ چہ آیانی زوربیگواھی ءَ کھول ءِ مردم جنجالانی دیمپان اَنت۔
گل ءَ کھول دلجمی داتگ اَنت کہ دین مھمد ءُ دل جان ءِ بیگواھی ءِ کیس پہ بیگواھیں مردماں جوڑ کنگ بوتگیں کمیشن ءُ سرکار ءِ کر ءَ دیم دیگ بنت ءُ پہ آیانی سلامتی آجوئی ءَ گل ھمک جاہ ءَ توار جست کنت۔