پشین/ مستونگ/ کیچ: پجار نہ بوتگیں سلاہ بندیں مردماں زورگریں پاکستانی لشکر ءِ سر ءَ اُرش کرتگ۔
پشین ءَ پجار نہ بوتگیں سلاہ بندیں مردماں پاکستانی لشکر ءِ جوڑ کرتگیں چیریں ادارھانی کارمندانی ماڑی یے گوں دستی بمب ءَ نشانگ کرتگ۔ دستی بمب ماڑی ءِ تہ ءَ کپتگ ءُ ترک اتگ۔
پشین ءِ واکدار ءَ اُرش ءِ گپ راست کرتگ ءُ گوشتگ کہ تراک ءِ آسر ءَ چیریں ادارھانی دو کارمند ٹپی بوتگ اَنت۔
مستونگ ءَ پجار نہ بوتگیں سلاہ بندیں مردماں پاکستانی لشکر ءِ بنجل ءِ سر ءَ اُرش کرتگ۔ تیر ءُ تراکانی توار داں دور ءَ اش کنگ بوتگ اَنت۔ اُرش ءِ آسر ءَ پاکستانی لشکر ءِ جانی تاوان ءِ ھال اِنت۔
ھمے وڑ ءَ کیچ ءِ بنجاھی شھر تربت ءَ بالی پٹ ءِ نزیک ءَ تراکانی توار اش کنگ بوتگ اَنت۔
ھندی مردمانی گوشگ اِنت کہ کم چہ کم شش ءِ نزیک ءَ تراکانی توار اش کنگ بوتگ اَنت۔ تراکانی توار ءَ پد پاکستانی لشکر ءَ شھر ءِ جتائیں دگ بستگ اَنت ءُ پٹ ءُ پول کرتگ۔
بنشون ءِ رد ءَ کیچ ءِ ھند بالیچہ ءَ سے تراکانی توار اش کنگ بوتگ اَنت۔ تراکاں پد پاکستانی لشکر ءُ پولیس ھما نیمگ ءَ روگ ءَ گندگ بوتگ اَنت۔
