مستونگ: زورگریں پاکستانی لشکر ءِ جارکش آئی ایس پی آر ءَ سے سلاہ بندیں مردمانی کشگ ءُ سے مردم ءِ ٹپی کنگ ءِ ٹاپار جتگ۔
آئی ءَ ماں رسانکدر ءَ وتی شنگ کرتگیں جارے ءَ ٹاپار جتگ ءُ گوشتگ کہ لشکر ءَ مستونگ ءَ اھواتی ھالے ءِ بنیاد ءَ لشکرکشی کرتگ ءُ بی ایل اے ءِ سے جنگول کشتگ ءُ سے ٹپی کرتگ۔ اے مردم ھند ءَ کاروائیاں ھوار اَنت۔
آئی ءَ گوشتگ کہ اے سلاہ بندیں مردماں 12 اگست ءَ پنجگور ءِ کمک دمگدار شھید کرتگ۔
بلے پاکستانی لشکر ءَ کشتگیں مردمانی پجار نہ گوشتگ اَنت، اے باروا چہ آدگہ بنشوناں گپ راست کنگ نہ بوتگ۔
یات بہ بہ اِت کہ بلوچستان ءَ پاکستانی لشکر زور بیگواھیں مردماں دروگیں میڑاں شھید کنت ءُ آیاں سلاہ بندیں مردم پیش دار ایت۔
پاکستانی لشکر ءِ دروگیں میڑاں کشگ بوتگیں مردم چہ زور بیگواھیں مردماں پجارگ بوتگ اَنت، بلے ایشانی باروا ھچ وڑیں ھال دیم نہ یتکگ۔
