بلوچستان آجوئی سنگر ( بی ایل ایپ ) ءِ جارکش میجر گھرام ءِ ماں رسانکدر ءَ وتی شنگ کرتگیں درشانے ءَ گوشتگ کہ بی ایل ایپ ءِ نیمگءَ دشت ءَ جنگلانی گڈوک ءُ بھا کنوک کڈن کنگ بوتگ اَنت کہ آ جنگلانی گڈگ ءَ یل بہ کن اَنت اگاں نہ آیا نی بگیری ءَ ترندیں کاروائی کنگ بیت۔ جنگلانی گڈک ءَ ھواریں مردم بی ایل ایپ ءِ نیمگ ءَ دزگیری، مزنیں میار ءُ جانی ءُ مالی تاوان دیگ بنت۔
آئی ءَ گوشتگ کہ گوستگیں لھتے وھد اِنت اے برجاھیں کار ءَ چہ نزیک ءَ چارگ ءَ ایں درسیں ھواریں مردم دری ٹیکدار ءُآیانی چیردستی ءَ کارکنوکیں مردم نشان کنگ بوتگ اَنت۔ بی ایل ایپ ءَ تچک کرتگ کہ گل بلوچستان ءَ مڈیانی لٹ ءُ پل، جنگلانی گڈوک، پیش ءِ بازیں کچے ءَ پہ باپاری کنگ ءُ جنگل ءِ ساھدارانی شکار ءَ نیل ایں ، اے درشانءَ جنگل ءِ گڈوکاں کڈن کن ایں آ زوت سرپد بہ بنت ءُ وتی میارباریں پرکاریاں بند بہ کن اَنت۔
جارکش ءَ گوشتگ کہ بی ایل ایپ چہ مردمانی گوشگ ءَ سرپد بوتگ کہ دشت ءِ ھند کنچتی، بشولی، کوھک، چہ کڈان ءَ بگر داں جام مھمد بازار ءَ لھتے مردم بازیں کچے ءَ جنگلاں گڈگ ءَ اَنت۔ پہ درچکانی گڈگ ءَ ڈنی ءُ گوں ھندی ٹیکداراں سودا جنگ بوگ ءَ اِنت۔ بلوچستان ءِ جنگل راجی مڈی اَنت چونیں ھم مردم یا ٹکے ءِ میراس نہ اَنت۔ جنگل ءِ یک ٹولے پہ بھا ءِ نیت ءَ بُرگ ءُ برگ ءَ نیل ایں۔ ھما مردم کہ بلوچستان ءَبے کس سرپد بنت ءُ اے میارباریں کار ءَ باپاری کن اَنت چہ اے گپ ءَ شموشکار مہ بنت پہ بلوچ ءِ نپانی پھریزگ ءَ ادارہ ھست اَنت۔
آئی ءَ گوشتگ کہ بی ایل ایپ بلوچ لس مردمانی توان اِنت ایشی چہ لس مردمانی اوست ءِ پارست ءَ پہ راجی نپاں کارمرز کنت ءُ ما ھچ وڑ ءَ نہ لوٹ ایں کہ اے راجی دژمن ءَ ابید دگہ جاھے ءَ کارمرز بہ بیت ءُ بھر ءُ بانگ بہ بیت۔ پمیشکا گوں باسمائیں مردماں لوٹ کن ایں کہ بلوچستان ءِ جنگل، جنگل ءِ ساھدار ءُ پہ چاگرد ءِ پھریزگ ءَ ھمتوار بہ بہ اِت دانکہ پہ ایشی دارگ ءَ مارا زور کارمرز کنگ مہ لوٹ ایت۔
جارکش ءَ گوشتگ کہ مولمی مٹی پہ سرجمیں جھان ءَ یک جنجالے جوڑ بوتگ۔ بلوچستان ءَ ایشی سان ھمک سال ءَ ھورانی ھار ءِ دروشم ءَگندگ بیت، چہ جنگلانی گڈگ ءِ آسر ءَ جاور گنتر بنت۔ زانتکار ءُ مولمی مٹیانی سر ءَ چاروکیں مردمانی گوشگ اِنت کہ بلوچستان ءَ درچکانی کشار ءِ تہ ءَ سکا کمی آتکگ۔ بلوچستان ءَ پاکستانی لشکر جنگلاں سوچگ ءَ اِنت ءُ اے میاربارانی سروکی ءَ کنگ ءَ اِنت کہ آ جنگل ءِ گڈگ ءَ ھوار اَنت۔
آئی ءَ گوشتگ کہ بلوچ ھمک پڑا وتی جنگ ءَ وت مڑ ایت ایشی تہ ءَ مولمی مٹی ھم ھوار اَنت۔ مارا درچکانی چہ بازیں کچے ءَ گڈگ ءَ ابید درچک کشگ لوٹ اَنت۔ بلوچستان ءِ ھندی ادارہ ءُ لس مردم ھم پہ مولم ءُ جنگل ءِ ساھدارانی پھریزگ ءَاے تکشام ءَ ھوار بہ بنت۔
میجر گھرام ءَ گوشتگ کہ اے جنگل گڈوکاں گڈی ءَ بیھار دیں کہ زوت جنگل ءِ گڈگ ءَ بند بہ کن اَنت، اگاں نہ وتی جان ءُ مال ءِ تاوان ءِ زمہ وار وت اَنت۔
