ڈاکٹر ابدلھی ءِ گھار ءَ وتی شنگ کرتگیں درشانے ءَ گوشتگ کہ ڈاکٹر ابدلھی ء ھاجی مھمد اسلم جاہ منند آواران بیدی یک جون ءَ 2024 ءَ ریاستی لشکر ءُ چیریں ادارھانی کارمنداں بیگاہ ءِ پنچ ءَ چہ آواران نوندڑہ ءَ آئی جند ءِ نادراھجاہ ءَ بیڑ برتگ ءُ ابدلھی آوار جنگ ءَ پد چیریں بندیگجاھے ءَ بند کرتگ۔ دو ماہ ءُ ھبدہ روچ ءِ گوزگ ءَ پد آئی ھچ وڑیں ھال نیست۔
آئی ءَ گوشتگ کہ گس ءِ مردم بیھار دیگ بوگ ءَ اَنت کہ اگاں بے توار نہ بوت اِت دانکہ زندگ اِنت بندیگ کنگ بیت۔ داں 25 جولائی ءَ وھد داتگ اَت پد ءَ ھم یل کنگ نہ بوت ءُ نیکہ دیم ءَ آرگ بوتگ۔
آئی ءَ گوشتگ کہ منی برات زوتاں چہ زوت آجو کنگ بہ بوت 20 اگست ءَ سے شمبے ءِ روچ ءَ چہ بلوچستان زانشتجاہ ءَ داں شال پرس کلب ءَ زھرشانی روانکے کش ایں۔
آئی ءَ گوں درسیں مردم دوست، سیاسی ءُ چاگردی کارکن، نودربر گل ءُ آدگہ مردماں لوٹ کرتگ کہ آ زھرشانی ءَ بھر بزور اَنت ءُ زوریں بیگواھی ءِ بگیری ءَ توار چست بہ کن اَنت۔
