بلوچستان آجوئی سنگر ( بی ایل ایپ ) ءِ جارکش میجگر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں آواران ءِ ھند کولواہ ءَ زورگریں پاکستانی لشکر دو جتائیں اُرشاں نشانگ کُرتگ ءُ ھپت کارمند کُشتگ ءُ سَے ٹپی کُرتگ ءُ سر ویلینس ڈرون کیمرہ نشانگ کُرتگ ءُ دور داتگ۔
آئی ءَ گوشتگ کہ اولی اُرش ءَ سرمچاراں دہ اگست ءِ بیگاہ ءِ ھپت ءَ گیشکور کولواہ ءَ زورگریں پاکستانی لشکر ءِ بنجل ءِ سر ءَ گوں وتکاریں سلاھاں اُرش کُرتگ، اُرش ءَ دژمنیں لشکر ءِ یک کارمندے مُرتگ ءُ یکے ٹپی بیتگ۔
جارکش ءَ گوشتگ کہ دگہ یک اُرشے ءَ سرمچاراں دہ اگست ءِ شپ ءِ ھشت ءَ ڈنڈار کولواہ ءَ برجاھیں زورگریں پاکستانی لشکر ءِ بنجل ءِ نزیک ءَ شُتگ ءُ چہ دونیمگ ءَ گوں نوکین ءُ وتکاریں سلاھاں اُرش کُرتگ، اُرش ءَ زورگریں لشکر ءِ شش کارمند مُرتگ ءُ دو ٹپی بیتگ۔ اُرش داں نیم ادار ءَ برجاہ بیتگ۔
آئی ءَ گوشتگ کہ اُرش ءَ پد دژمنیں لشکر ءَ سرمچارانی رندگیری کنگ ءَ سر ویلینس ڈرون بال داتگ بلے سرمچاراں زوت ڈرون کیمرہ نشانگ کُرتگ ءُ دور داتگ۔
جارکش ءَ گوشتگ کہ چہ وتی ھیل ءَ لاچار ءُ پروش وارتگیں دژمن وتی بےسوبی ءُ زھر ءَ لس آبادی ءِ سَر ءَ کش ایت ءُ لس مردماں ءَ نشانگ کنت۔ اے اُرش ءَ ھم دژمنیں لشکر ءِ مارٹر گولا گِسے ءَ کپتگ کہ چہ ایشی ءَ یک زھگے ستارہ ء شبیر شھید بیتگ۔
آئی ءَ گوشتگ کہ بلوچستان یک زورگِپتیں ڈیھے ءُ راج اے زورگری ءَ نہ منّ ایت۔سرجمیں بلوچستان ءَ چاردہ اگست سیاھیں روچے ءِ بستار ءَ برجم دارگ بیت۔ اے سوبمندیں اُرش، بی ایل ایپ ءِ ٹیکنیکل ٹیم، انٹیلیجنس ٹیم، اسپیشل پورس ءُ کُربان یونٹ ءِ نیمگ ءَ کنگ بیتگ کہ نوکیں دور ءَ گل ءِ کارکِرد ءُ گل ءِ ٹیم ورک ءُ توانمندی ءِ نشون اِنت۔
جارکش ءَ گوشتگ کہ بی ایل ایپ یک راجی زورے کہ گوں وتی سیاسی سیتاں سلاہ بندیں جنگ ءِ دْروشُم ءَ برجاہ اِنت۔
میجر گھرام ءَ ارشانی زمہ واری من اِتگ اَنت ءُ گوشتگ کہ داں بلوچستان ءِ آجوئی ءَ چوشیں مھکمیں اُرش برجاہ بنت۔
