بلوچ یکجھتی کمیٹی ءِ نیمگ ءَ بلوچ راجی مچی ءِ درچ ءَ تربت ءَ شھید پدا اھمد چاراہ ءَ برجم داشتگیں راجی مچی ءَ بلوچ یکجھتی کمیٹی ءِ سروک ڈاکٹر ماہ رنگ ءَ تران کرتگ ءُ گوشتگ کہ چہ سالاں زوراکی ءُ ناھکیانی آماچیں مردماں پہ وتی آزیزانی زوریں بیگواھی ءِ بگیری ءَ یکجاہ بوگ ءُ راجی زرمبشت ءَ بھر زورگ لوٹ ایت۔ ریاستی لشکر ءِ دیم ءَ بلوچانی توان یک راجی گوستانکے جوڑ بوتگ ءُ ما ھمے پیش داشتگ کہ چہ زوراکی، زندانی کنگ، زوریں بیگواھی ءَ بلوچانی توان ءَ پروش دات نہ کن ئے۔
آئی ءَ گوشتگ کہ نوں وھد ھمیش اِنت بلوچ چہ وتی مچی توان ءَ ریاستی زوراکیاں پروش بہ دنت ءُ چہ سالاں آئی برجاھیں زورگپتی ءَ ھلاس بہ کنت۔ گوستگیں چنچو سال اِنت کہ اے زورگپت مئے مڈیاں لٹ ءُ پل کنگ ءَ اِنت۔ مئے ورنایاں آوار جنگ ءُ بیگواہ کنگ ءَ پد آیانی ژانگولیں جوناں چگل دیگ ءَ اِنت۔ آئی ءَ وتی زورگپتی ءُ زوراکی پیش داشتگ اَنت بلے ما گوں ھمت، توکل، سبر ءُ اوپار ءَ گھگیری کرتگ ءُ زورگر ءَ ھمے پیش داشتگ کہ اے مئے سرڈگار اِنت اے مادن مئیگ اَنت، اگاں تو ایشانی لٹ ءُ پل ءِ جھد کرت گڑا بلوچ ترا سوبین بوگ ءَ نیل اَنت۔
ڈاکٹر ماہ رنگ ءَ گوشتگ کہ گوں بلوچ ورنایاں ھمے لوٹ ءَ کن آں کہ آ وتی راجی زمہ واریاں بہ مار اَنت ءُ راجی زرمبشت ءَ بھر بزور اَنت ءُ چنچو بوت کنت اے زوریں بیگواھی ءُ زورگپتی ءِ بگیری ءَ توار چست کنگ ءَ وتی کرد ءَ پیلو بہ کن اَنت۔
آئی ءَ گوشتگ کہ وھدے ما راجی مچی ءِ جار جتگ ءُ پد ءَ کاروانانی آھگ بندات بوتگ اَنت گڑا پہ آیانی دارگ ءَ سرجمیں بلوچستان ءَ شھدگ بند کنگ بوتگ اَنت۔ پہ کاروانانی دارگ ءَ کاروان ءَ ھواریں مردم لٹ شاپ کن بوتگ اَنت۔ بلے بلوچانی توکل نزور نہ بوتگ کج ءَبوتگ اَنت گڑا ھمود ءَ نشتگ اَنتءُ راجی مچی اِش برجاہ داشتگ۔ اے چہ گوادر ءِ یک روچے ءِ مچی ءَ گیشتر توکل، توانمند ءُ پہ راجی زرمبشت ءِ باندات ءَ سوبمند گندگ بوتگ اَنت۔
ڈاکٹر ماہ رنگ ءَ گوشتگ کہ ریاست نوں بزانت بلوچ راج ءِ زور ءَ دیم ءَ سر ءَ جھل نہ کنت، بلکیں گیش مھکم بیت ءُ توار چست کنت۔ اے زرمبشت چہ اد ءَ ھلاس نہ بیت بلکیں چہ اے جاہ ءِ بندات بوتگ۔
