بلوچ یکجھتی ءِ جارکش ءَ گوشتگ کہ پاکستانی لشکر ءِ بلوچ یکجھتی کمیٹی ءِ بگیری ءَ پریس کانپریس ھمے گپ ءِ تچکیں منانک اِنت کہ لشکر چہ بلوچانی زور ءُ ایمنیں جھد ءَ ترس آماچ اِنت۔ سیاسی ءُ مردمی ھکانی زرمبشت ءِ بگیری ءَ ریاستی لشکر ءِ پریس کانپریس وت ھمے گپ ءِ منانک اِنت کہ ریاستی لشکر تچکی ءَ بلوچ چکچینی ءُ مردمی ھکانی لگتمالی ءَ ھوار اِنت۔ مئے چہ بنداتی روچاں ھمے گپ اِنت کہ ریاستی لشکر ءُ چیریں ادارہ تچکی ءَ بلوچ چکچینی کنگ ءَ اَنت ءُبلوچستان ءَ گنتریں مردمی ھکانی لگتمالی ءَ ھوار اَنت۔ مرچی ھزارانی کچ ءَ مردم بلوچ چکچینی ءُ مردمی ھکانی لگتمالی ءِ بگیری ءَ دگانی سر ءَ در آتکگ اَنت ءُ بلوچ چکچینی ءِ ھلاس کنگ ءِ لوٹ ءَ کنگ ءَ اَنت۔ ریاست بلوچستان ءَ مردمی ھکانی لگتمال کنگ ءَ بند کنگ ءُ بلوچ چکچینی ءِ ھلاس کنگ ءَ ابید ریاست ءِ لشکر ایمنیں سیاسی زرمبشت ءِ بگیری ءَ پریس کانپریس کنگ ءَ اِنت، اے مئے گپ ءِ راست کنگ ءُ میارباری ءِ منگ اِنت۔
آئی ءَ گوشتگ کہ ما لشکر ءَ داوت دے ایں کہ آ چونیں ھم چہ وتی پلہ مرزاں ابید سیمی پارٹی یا مردمی ھکانی گلے ءِ پارست ءَ یک پٹ ءُ پولی پترے جوڑ بہ کنت کہ آ ریاستی لشکر ءِ بلوچ یکجھتی کمیٹی ءِ سر ءَ جتگیں بھتامءِ پٹ ءُ پول ءَ بہ کنت۔ اگاں چہ تئی جتگیں بھتاماں یکے راست بوت گڑا ما پاکستان ءَ ھوار جھان ءِ چونیں ھم آمیدگسے ءَ وت ءَ پیش کن ایں۔ اگاں بھتام راست نہ بوت اَنت گڑا پاکستانی لشکر بلوچ چکچینی ءَ بہ من ایت ءُ وت ءَ پہ سزا ءَ پیش بہ کنت۔
آئی ءَ گوشتگ : ما سرپد بہ بہ ایں کہ ریاستی لشکر ءُ یک لس مردمی سیاسی زرمبشتے ءِ بگیری ءَ پریس کانپریس بلوچ یکجھتی کمیٹیءَ ھوار اے دمگ ءِ درسیں ایردستیں راجانی زرمبشتانی لیکھاں من ایت کہ پاکستان ءَ راجمستری، راھبند ءُ کانود ھچ بستار نہ دار اَنت۔ بلکیں اد ءَ چہ بنداتی روچاں لشکر ءِ سرکاری ءَ گنتریں وتسری ءُ زوراکی برجاہ داشتگ۔ پاکستانی لشکر ءِ اے مدام کار اِنت کہ اے دمگ ءَ چونیں ھم پہ سیاسی زرمبشتےءِ دارگ ءَ ڈنی ڈیھانی کارمند، ڈنی پنڈءُ راجدروھی ءِ بھتام ءَ بے توار کنگ بہ بیت ءُ زور دیگ بہ بنت۔ بلے اے گپ ءَ زانگ ءَنہ اِنت کہ اے 1970 نہ اِنت کہ تو گوں دروگیں پندل ءُ دروگ بندگ ءَ اے مھلوک ءُ میان استمانی جھان ءَ رد دات کن ئے۔
آئی ءَ گوشتگ کہ بلوچ یکجھتی کمیٹی ءِ بلوچ چکچینی ءِ بگیری ءَ زرمبشت تیوک ءَ ایمنیں مھلوک ءِ سیاسی زرمبشتے سرجمیں بلوچستان ءَ شریں وڑیں مردمانی پلہ مرزی، توان ءُ زور گون اِنت۔ ما سرپد بہ بہ ایں کہ بلوچ یکجھتی کمیٹی ھمے مردمانی زور، توان ءُ ایمنیں جھد ریاست ءَ دوست بوگ ءَ نہ اِنت۔ پمیشکا یک نیمگے ءَ سرجمیں زور ءَ کارمرز کنگ ءُ مردمانی جھد ءِ ھلاس کنگ ءِ جھد ءَ اِنت ءُدومی نیمگ ءَ پاکستانی لشکر پریس کانپریس ءِ پارست ءَ دروگیں گپ جوڑ کنگ ءِ جھد ءَ اِنت۔ چہ ایشی ھمے پدر بوگ ءَ اِنت کہ ریاست پاکستان بلوچستا ن ءَ کدی ھم سیاسی جھد ءَ اوپار کرت نہ کنت بلکیں گوستگیں ھپتاد سال اِنت کہ ھمے وڑ ءَ توپک ءِ زور ءِ سر ءَ سرکاری کنگ ءُ پیداک اِنت۔ ھمے وڑ ءَ چہ زور ءُ آزاردھی ءِ سر ءَ وتی سرکاری ءِ برجاہ دارگ لوٹ ایت۔ پمیشکا کہ لس مردمی سیاسی جھد ءِپارست ءَ بلوچستان ءَ گنتریں جاور، زور ءُ توپک ءِ سرکاری ءُ بلوچ چکچینی سرجمیں جھان ءِ دیم ءَ پدر اِنت۔
آئی ءَ گوشتگ کہ ما ریاست ءُ آئی لشکر ءَ تچکی ءَ گوشگ لوٹ ایں کہ بلوچ یکجھتی کمیٹی نہ چہ تئی دروگیں پریس کانپریس ءَ چہ وتی لس مردمانی جھد ءَ پد کنز بیت ءُ نہ چونیں ھم زورے ءَ دارگ بیت۔ ما بلوچ چکچینی ءِ بگیری ءَ وتی جھد ءَ گیشتر مھکم ءُ تیز کنگ ءُ چہ مھلوک ءِ زور ءِ سر ءَ چہ بلوچ سرڈگار ءَ بلوچ چکچینی ءَ ھلاس کن ایں۔ ڈنی پراکسی بوگ یا پنڈ گرگ مئے سیاسی ربیت ءِ بھر نہ بوتگ، مئے جھد راھبند ءُ لیکہ ءِ سر ءَبرجاہ اِنت ءُ مئے زور تیوک ءَ مھلوک اِنت۔ اے گپ ءَسرجمیں جھان سرپد اِنت کہ ڈنی پنڈ زورگ ءُ ڈنی پراکسی تئی دودمان ء بھرے۔
