بلوچ یکجھتی کمیٹی ءَ ماں رسانکدر ءَ وتی شنگ کرتگیں درشانے ءَ گوشتگ کہ کراچی روانک ءِ سر ءَ پولیس ءَ بیڑ برتگ بلوچ جنین ءُ زھرشانی کنوک لٹ شاپ کرتگ اَنت ءُ باز مردم دزگیر کرتگ۔
آئی ءِ گوشتگ کہ بی وائی سی ءِ زھرشانی کنوکانی سر ءَ سند پولیس ءَ گنتریں لٹ شاپ، کم چہ کم پنجاہ بلوچ جنین ءُ مرد دزگیر کرتگ اَنت۔ سیاسی کارکن ءُ جنین دگ ءِ سر ءَ گراں کرتگ ءُ آیان ءَ پولیس موبائل گاڑی ءَ مان کرتگ ءُ پولیس گس ءَ برتگ اَنت۔
آئی ءَ گوشتگ کہ مرچی بلوچ یکجھتی کمیٹی ءِ نیمگ ءَ گوادر ءَ ھوار سرجمیں بلوچستان ءَ ریاستی ناشرکاریانی بگیری ءَ کراچی ءَ روانک کشگ ءَ بوتگ اَنت۔ روانک چہ آرٹس کونسل ءَ داں کراچی پریس کلب ءَ روگ ءِ چن ءُ لانچ ءَ بوتگ کہ پولیس ءَ آیانی سر ءَ ارش کرتگءُ لٹ شاپ کرتگ اَنت۔ انگت ءَ چہ دزگیری ءَ پد زھرشانی کنوکانی مزنیں کچے آرٹس کونسل ءِ نزیک ءِ نندانک ءَ نشتگ کہ نندانک انگت برجاہ اِنت۔
آئی ءَ گوشتگ کہ ایمنیں زھرشانی کنگ ھمک شھری ءِ ھک اِنت ءُ اے ھک ءَ کانود ھم دنت۔ بژن اِنت کہ راھبند ءِ پاسداری ءَ ریاست و ت کنگ ءَ نہ اِنت، لس مردماں چہ راجمستری ھک ءَ نہ تیوک ءَ زبھر کنگ ءَ اِنت بلکیں گوں ناھکیں آزاردھی ءَ درسیں ربیت ءُ واکاں پادمال کنگ ءَ اِنت۔
