بی این ایم جتائی ڈیھانی سروک، اکوامتھدہ ءُ مردمی ھکانی گلاں نمدی نبشتہ کنگ ءَ اِنت۔
بلوچ راجی زْرمبشت( بی این ایم) ءِ بنجاھی جارکش ءَ برتانیا ءِ لیبرپارٹی ءُ پارلیمنٹ ءِ باسک جان میکڈونل ءِ منت گِپتگ کہ آئی ءَ برتانیا ءِ پارلیمنٹ ءَ بلوچستان ءَ پاکستانی لشکر ءِ نیمگ ءَ زوربیگواھی، درآمیدگسی کوش، گپ کنگ ءُ مُچیانی سر ءَ پابندی جنگ ءُ مردمی ھکانی بگیریانی سر ءَ پہ گپ ءُ تران کنگ ءَ کرار دادے پیش کُرتگ کہ کرار داد ءِ تہ ءَ پاکستانی لشکر ءِ نیمگ ءَ بلوچستان ءَ زوربیگواھی، در آمیدگسی کوش، گپ کنگ ءُ پُرایمنیں مُچیانی سر ءَ پابندیانی ھلاس کنگ ءِ لوٹ کنگ بیتگ۔
جارکش ءَ گْوشتگ کہ بی این ایم ءَ برتانیا ءِ پارلیمنٹ ءِ جتائیں باسکاں نمدی نبشتگ ءُ چہ آیاں جان میکڈونل ءِ نیمگ ءَ پیش کُرتگیں کرار داد ءِ پلہ مرزی ءِ لوٹ کُرتگ داں کہ اے جیڑہ ءِ سر ءَ برتانیا ءِ پارلیمنٹ ءَ گپ ءُ تران کنگ بہ بیت۔ آیانی نمدیانی تہ ءَ بلوچستان ءَ مردمی ھکانی بگیریانی چار ءُ گزار کنگ ءِ لوٹ کنگ بیتگ۔
آئی گْوشتگ کہ بلوچ راجی زْرمبشت (بی این ایم)چہ بازیں سالاں جتائیں ڈیھانی ءُ تیوک ءَ برتانیا ءِ پارلیمان ءِ باسکاں رھوت کنگ ءُ چہ آیاں مدام لوٹ کنگ ءَ اِنت کہ آ بلوچستان ءَ پاکستانی لشکر ءِ نیمگ ءَ بیتگیں مردمی ھکانی بگیریاں برتانیا ءِ پارلیمان ءَ گپ بہ کن اَنت ءُ برتانیا ءِ سرکار بلوچستان ءَ سیاسی کارکن، دانشورو ءُ اھوالکارانی زوبیگواھی ءُ درآمیدگسی کوش ءِ گِر ءُ دار کنگ ءَ وتی کِرد ءِ پیلو کنگ ءِ لوٹ ءَ بہ کن اَنت۔
جارکش ءَ گْوشتگ کہ گل بلوچستان ءَ انیگیں وئیل ءُ برجاھیں چکچینی ءِ نوکیں دْرچ ءِ باروا زوت جتائیں ڈیھانی سروک ءُ اکوامتھدہ ءَ ابید میام استمان ءِ مردمی ھکانی گلاں نمدی نبشتہ کنگ ءَ اِنت کہ آیان ءَ بلوچستان ءَ برجاھیں مردمی ھکانی پادمالیانی باروا سرپدی دیگ بیت ءُ چہ آیاں لوٹ کنگ بیت کہ آ پاکستان ءَ بلوچستان ءَ برجاھیں مردمی ھکانی پادمالیانی باروا جُست بہ کن اَنت۔
آئی ءَ گْوشتگ کہ گل ءِ دری کارانی تَک ءِ نیمگ ءَ برتانیا ءِ مزن وزیر ءَ یک پٹیشن ے دیگ بیت کہ آئی ءِ تہ ءَ پاکستان ءِ باروا بلوچستان ءَ مردمی ھکانی بگیریانی گِر ءُ دار کنگ ءَ سیاسی ءُ سپارتی زور دیگ ءِ لوٹ کنگ بیت۔
جارکش ءَ گْوشتگ کہ گل چہ بازیں سالاں گوں اکوامتھدہ ءَ بندوکیں جتائیں تْرامگیجاں (ادارہ) رھوت کنگ ءَ اِنت، ھمے سال ءَ ستمبر ءَ اکوامتھدہ ءِ مردمی ھکانی جھلی ترامگیجانی جھگیراں گوں بی این ایم ءِ جھگیراں گند ءُ نند کنگ ءِ واھگ داشتگ۔ اے گند ءُ ننداں چہ گل ءِ نیمگ ءَ اکوام متھدہ ءِ سریں جھگیران ءَ بلوچستان ءَ برجاھیں مردمی ھکانی بگیریانی باروا سرپدی دیگ بیت داں کہ بلوچستان ءِ جیڑہ اکوامتھدہ ءَ چِست کنگ بہ بیت۔
