شال: پہ زوریں بیگواھیا نی بگیری ءَ شدکشیں زھرشانی گدانءَ 5529 روچ سرجم بوتگ۔
چارشمبے ءِ روچ ءَ چہ کوہ ءِ سلیمان ءَ بلوچ نودربرانی یک ٹولی یے آتکگ، لتیپ، سدام، اسپند جان، سلیم ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچ ءِ ایمنیں جھد پہ وتی آزیزانی آجوئی ءَگوں گوستانکی درچے ءَ برجاہ اِنت۔ پاکستان ریاست چہ وتی پروش ءَ ترس آماچ اِنت سکا رستری کنگ ءَ اِنت۔ ھپتاد ءُ پنچ ھزار ءَگیش بلوچ چیریں آزار جاھاں زوراکیانی دیمپان اِنت۔ چہ دو ھزار ءَ گیش جتائیں بھرگاں سیادی داروکیں بلوچانی بیگواھیں مردمانی ژانگولیں لاش جنگلاں کپت اَنت۔ چہ لشکر کشیاں لکانی کچ ءَ مردم پہ وتی گس ءُ جاھانی یل کنگ ءَ لاچار بوتگ اَنت۔
آئی ءَ گوشتگ کہ یکشل ءَ زوراکیاں ابیدوتگڑیں مردمی ھکانی گلءُ وتگڑیں سول سوسائٹی، رسانکدر ءُ امیدگس ءِ گوشاں مورے نہ وارت۔ بلے بلوچ پسگانی ایمانداری ءَ میان استمان لاچار کرتگ کہ آ بلوچانی توار ءَ گوش بہ دار ایت۔ میان استمان ءَ پہ بلوچ راج ءِ توار ءَ اے وتگڑیں راجمستری ریاست ءَ گوں ترندی ءَ لوٹ کرتگ۔
ماما کدیر گوشتگ کہ ما گوں اکوام متھدہ ءُ مردمی ھکانی ادارھاں لوٹ کن ایں کہ بلوچستان ءَ پاکستان ءِ رستری،ناشرکاری، زوراکی ءُ مردمی ھکانی ناھکیں لپاشگ ءِ گر ءُ دار ءَ گامگیج بہ زور ایت ءُ پہ بلوچ چکچینی، آبادیانی سر ءَ بمبگواری، آوار جنی، زوریں بیگواھیءُ ژانوگولیں لاشانی چگل دیگ ءِ دارگ ءَ پاکستان ءَ زور بہ دے اِنت۔
