شال: بیگواھیں بلوچانی توار ( وی بی ایم پی ) ءِ سرکماش نسر اللہ ءَ وتی شنگ کرتگیں درشانے ءَ گوشتگ کہ زور بیگواھیں ممتاز مراد ءِ کیس آئی برات ءَ وی بی ایم پی ءِ کِر ءَ یاداشت کرتگ۔
آئی ءَ گوشتگ: امتیاز مراد ءِ گوشگ اِنت کہ آئی برات ممتاز مراد ء مھمد مراد 6 ستمبر 2022 ءَ پاروک چاراہ ھزار ءَ درکانودی آوار جنگ ءَ پد بیگواہ کنگ بیتگ۔ داں انوں ممتاز مراد ءِ زوریں بیگواھی ءَ دو سال سرجم بوگ ءَ اِنت بلے مارا برات ءِ بابت ءَ ھال دیگ ءَ نہ اَنت۔
امتیاز مراد ءِ گوشگ اِنت کہ آئی برات ممتاز مراد چہ ایشی پیش دو رند ءَ زور بیگواہ کنگ بیتگ۔ بندات ءَ 2016 ءَ زور بیگواہ کنگ بیتگ ھپت ماہ ءَ پد یل کنگ بیتگ، دومی رند ءَ 17 نومبر 2017 ءَ زور بیگواہ کنگ بوتگ دو سال ءَ پد یل کنگ بوتگ۔ نوں سیمی رند ءَ پد ءَ لشکر ءَ زور بیگواہ کرتگ چہ ایشی کھول پہ ممتاز مراد ءِ زندگی ءَ ترسگ ءَ اِنت۔ چوش مہ بیت کہ لشکر آئی جانی تاوان مہ دنت۔
نسر اللہ ءَ گوشتگ کہ گل ءِ نیمگ ءَ امتیاز مراد دلجمی دیگ بیتگ کہ آئی برات ممتاز مراد ءِ کیس ءَ سرکار، پہ بیگواھیں مردماں جوڑ بوتگیں کمیشن ءُ اکوام متھدہ ءِ ورکنگ گروپ ( پہ زور بیگواھیں مردماں جوڑ بوتگ) سر کن ایں ءُ پہ آئی آجوئی ءَ ھمک جاہ ءَ توار چست کن ایں۔
نسر اللہ ءَ گوں سرکار ءَ لوٹ کرتگ ءُ گوشتگ کہ آ پہ ممتاز مراد ءِ درکانودی آوارجنی ءُ دراجکشیں زوریں بیگواھی ءَ دلگوش ءَ گور بہ کنت ءُ پہ آئی آجوئی ءَ دلجمی بہ دنت ءُ کھول ءَ چہ رنجاں بہ رکین ایت۔
