شال: پہ زور بیگواھیں مردمانی پدجنگ ءَ شال پریس کلب ءِ دیم ءَ برجاھیں زھرشانی گدان ءَ 5520 ءَ روچ سرجم بوتگ کہ انگت برجاہ اِنت۔
سے شمبے ءِ روچ ءَ بلوچ نودربرسروک زور بیگواھیں زاکر مجید ءِ مات گدان ءَ نندوک بوتگ۔ چہ سبی ءَ سیاسی ءُ چاگردی کارکن مولا داد، شھباز ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ بلوچ پسگانی زوریں بیگواھی ءُ پہ بیگواھیں مردمانی شھیدی ءِ باروا کارکنوکیں گل ءَ وتی سرجمیں گزارش شنگ کرتگءُ گوں اکوام متھدہ ءُ آدگہ میان استمانی ادارھاں بلوچستان ءَ دزمانجنی ءِ لوٹ کرتگ۔ بلوچستان ءَ ھزارانی کچءَ بلوچانی ژانگولیں لاش دزکپتگ اَنت۔
آئی ءَ گوشتگ کہ زور بیگوھی ءَ پد شھید کرتگیں مردمانی لاش پجارگ ءَ پد گلزمین ءِ میار کنگ بوتگ اَنت۔ آیانی تہ ءَ گیشتریں مردمانی دست ءُ پاداں سانکلانی نشان گندگ بوتگ اَنت، گوں ایشی ھواری ءَ سگریٹ ءِ سر ءَ داگ چمانی سر ءَ بے وابی ءِ نشان، لین ءِ کرنٹ ءُ جان ءِآزا ھم کشگ بوتگ اَنت۔
ماما کدیر گوشتگ کہ بیگواھیں مردمانی لاش گندگ بوتگ اَنت گڑا پولیس یا ھندی لیویز ءَ لاش دزگپتگ اَنت ءُ آیانی شھیدی ءِ درسیں گواہ ھلاس کرتگ اَنت گڑا نادراھجاہ ءِ مردگ جاہ ءَ ایر کنگ بوتگ اَنت۔ اے گپ راست اِنت کہ پاکستانی لشکر ءُ چیریں ادارھانی کارمند زور بیگواھیں مردماں شھید کنگ ءُ وتی جھلی ادارھاں ھال دیگ ءَ اَنت بلے بلوچ شھیدانی راز انگت ءَ چیر بوگ ءَ نہ اِنت۔
