شال: پہ زوربیگواھیں مردمانی پد جنگ ءَ وی بی ایم پی ءِ برجاھیں شد کشیں زھرشانی گدان ءَ 5924 روچ سرجم بوتگ۔نیشنل ڈیموکریٹک پارٹی ءِ بجاھی سروک سنا بلوچ گدان ءَ آتکگ ءُ گوں بیگواھیں مردمانی کھولاں ھمدردی درشان کرتگ۔
وائس پار بلوچ مسنگ پرسنز ءِ سرکماش نسراللہ بلوچ گوں بیگواھیں مردمانی کھولاں لوٹ کرتگ کہ آ وتی بیگواھیں مردمانی بیگواھی ءِ کیس ءَ گل ءِ کر ءَ یاداشت بہ کن اَنت۔ دانکہ بیگواھیں مردمانی کھول گوں منانک ءَ دیم ءَ نیا اَنت چو گل اے کیسانی سر ءَ کانودی کاروائی ءِ لوٹ ءَ کرت نہ کنت ءُ نہ ڈیھ ءُ جھانی ادارہ اے کیس ءَ یاداشت کن اَنت۔ چہ کھولاں ابید اے کیس ءَ دگہ ھچ پیمیں کانودی بستار نہ بیت۔
نسراللہ بلوچ ءَ گوشتگ کہ سیاسی ءُ نودربر گل ءُ سول سوسائٹی ءَ گوں لوٹ کناں کہ آ بیگواھیں مردمانی جیڑہ ءَ انسانی بنیاد ءَ دیم ءَ بیار اَنت ءُ بیگواھیں مردمانی کھولاں گوں منانک ءَ دیم ءَ آرگ ءَ وتی کرد ءَ پیلو بہ کن اَنت۔
